Rusiya Dağlıq Qarabağ münaqişəsinin həlli və Türkiyə-Ermənistan sərhədlərinin açılmasının bir-birindən asılı olduğunu İrəvanın diqqətinə çatdırdı. Suriya lideri Bəşər Əsəd ölkəsindəki müharibənin əsl səbəblərini açıqladı. Ankara üzv olduğu NATO-da şok effekti yaradacaq addım ata bilər. Ukraynada vəziyyət təhlükəli hal almağa başlayıb.
Lavrov İrəvanda Ermənistana şərt qoydu: Qarabağ münaqişəsinin həlli...
Rusiya iqtisadiyyatı ağır vəziyyətdə olan və Türkiyə ilə sərhədlərinin açılmasını səbirsizliklə gözləyən Ermənistana mesaj verib.
Rusiyanın xarici işlər naziri Sergey Lavrov İrəvanda jurnalistlərə açıqlamasında bildirib ki, Dağlıq Qarabağ münaqişəsinin nizama salınmasında irəliləyiş Türkiyə-Ermənistan münasibətlərinin normallaşması üçün əsas olacaq. Onun sözlərinə görə, Türkiyə münaqişəsinin nizama salınmasında pozitiv rol oynaya bilər.
“Əgər Ermənistan və Türkiyə Qarabağ münaqişəsinə baxmayaraq, öz münasibətlərini yoluna qoya biləcəklərsə, biz bundan yalnız şad olacağıq. Lakin bizim fikrimiz budur ki, Ermənistan-Türkiyə münasibətlərinin normallaşması münaqişənin nizama salınmasından keçir”, - deyə o, bildirib.
Lavrov qeyd edib ki, Ermənistanın blokadadan çıxarılması, regionda qarşılıqlı əməkdaşlığın qurulmasnda Türkiyə əhəmiyyətli rol oynaya bilər.
Ermənistan mediası isə yazıb ki, Rusiya Ermənistanda 102-ci hərbi bazadan savayı yeni hərbi baza yarada bilər.
Məlumata görə, bu hərbi baza Kollektiv Təhlükəsizlik Müqaviləsi Təşkilatına (KTMT) məxsus olacaq və ora qurumun gücləri yerləşdiriləcək. Baza ilə qərarın KTMT-nin bu gün İrəvanda keçirilən iclasında veriləcəyi bildirilir.
Bu hərbi bazanın de-yure Rusiyanın olmasa da, de-fakto Moskvaya məxsus olacağını deyilir. “Bu hərbi baza Ermənistanın şərq sərhədlərində, yəni Qarabağa yaxın ərazidə yerləşdiriləcək. Gözlənilir ki, Rusiya bu hərbi bazaya öz qoşunlarını yerləşdirəcək”, - erməni mediası yazıb.
Amerikanın nüfuzlu “Foreign Affairs” nəşri isə təklükəli proqnozla çıxış edib. Dağlıq Qarabağda aprel döyüşlərinin regionda gərginliyin olduğunu açıq şəkildə göstərdiyini yazan nəşr bu gərginliyin başa çatmadığını və yeni müharibənin başlaya biləcəyini qeyd edib.
Nəşrin məqaləsində ən diqqət çəkən məqam isə ərazilərin bir qisminin qaytarılması ilə bağlı proqnozdur.