Ərdoğanın “B” və “C” planı, III Dünya Müharibəsinin qoxusu...

Rusiya prezidentinin mətbuat katibi Dmitri Peskovun bu gün verdiyi bu açıqlama heç şübhəsiz ki, Qərbdə, xüsusilə NATO-da şok effekti yaradacaq.

Onun sözlərinə görə, Rusiya hava hücumundan müdafiə sistemlərinin Türkiyəyə çatdırılması məsələsinə baxa bilər. “Hərbi sahədə əməkdaşlıqla bağlı məsələlər Vladimir Putin və Rəcəb Tayyib Ərdoğanın görüşünün gündəliyində var idi. Türkiyə tərəfi arzu edərsə, Türkiyəyə hava-hücumundan müdafiə sistemlərinin çatdırılması imkanına baxıla bilər. Bu, təmiz ticarət məsələsidir”, - Peskov deyib.

Bəşər Əsəd: “... tək ümid Rusiyadır”

Heç şübhəsiz ki, Suriya prezidenti Bəşər Əsədin Rusiyanın “Komsomolskaya Pravda” nəşrinə müsahibəsində söylədiyi fikirlər gündəmdə xüsusi yer tutdu.

Dövlət başçısı Rusiyanın Suriyadakı tarazlığın dəyişdiyini bildirib: “ABŞ və müttəfiqləri burada aktiv olsalar da, hərəkətləri yanıldıcı idi, heç bir şey etmədilər. “İslam Dövləti” və “Ən-Nüsra” Cəbhəsi irəliləməyə davam edirdi. Ancaq Rusiyanın daxil olması ilə nəzarəti altında olan ərazilər azaldı”.

Suriyadakı kürdlərin böyük bir hissəsinin müstəqillik istəmədiyini deyən Bəşər Əsəd bildirib ki, bütün kürdləri, və eyni zamanda erməniləri, çeçenləri, türkləri və ərəbləri qiymətləndirmədən kürdlərin bir hissəsi ilə danışa bilməzlər. O, Suriyanın şimalındakı PYD (PKK terror təşkilatının Suriya qanadı) ilə dialoqu davam etdirdiyini, onlara silah göndərdiklərini deyib.

Bəşər Əsədin sözlərinə görə, Türkiyənin Suriya siyasətinin dəyişdirilməsi üçün tək ümidi Rusiyadır. O, Türkiyənin Suriyada həyata keçirdiyi “Fərat Qalxanı” əməliyyatını “işğal” adlandırıb.

“III Dünya Müharibəsinin qoxusu gəlir”: Bu sözləri də Bəşər Əsəd “Komsomolskaya Pravda” nəşrinə müsahibəsində deyib.

“Suriyada hazırda “soyuq müharibə”yə oxşar vəziyyəti müşahidə edirik. Düşünürəm ki, Qərb və xüsusilə ABŞ SSRİ-nin dağılmasından sonra “soyuq müharibə”ni dayandırmadır. Biz münaqişənin genişləndiyini görürük. Əsas məqsəd dünyanın üstündə Amerikanın hegemonluğunu saxlamaq, heç kəsə siyasi və ya beynəlxalq səhnədə partnyor olmağa icazə verməməkdir. Bu, bizim III Dünya Müharibəsi kimi təsvir etdiyimiz hadisənin qoxusudur. Amma bu, hələ birbaşa hərbi toqquşma deyil”, - Suriya prezidenti III Dünya Müharibəsi ilə bağlı səslənən fikirləri şərh edərkən deyib.

Obama Gülənin dərhal qaytarılmasını tələb etdi

Türkiyəli jurnalist yazar Ergün Diler isə bu gün maraqlı bir iddia ilə çıxış edib. Onun sözlərinə görə, ABŞ prezidenti Barak Obama Fəthullahçı Terror Təşkilatının (FETÖ) lideri Fəthullah Gülənin dərhal Türkiyəyə qaytarılmasını tələb edib.

Onun sözlərinə görə, avqustun 29-da ABŞ prezidenti, vitse-prezident Jo Bayden, müdafiə naziri Eşton Karter, Mərkəzi Kəşfiyyat İdarəsinin (CİA) başçısı Con Brennan və ABŞ Silahlı Qüvvələrinin Baş Qərargah rəisi Cozef Dunford bir masanın ətrafına toplaşıblar.

ABŞ prezidenti Barak Obama Fəthullahçı Terror Təşkilatının (FETÖ) lideri Fəthullah Gülənin dərhal Türkiyəyə qaytarılmasını tələb edib.

İraqın Mosul şəhərinin İŞİD terror təşkilatından azad edilməsi üçün keçiriləcək əməliyyata günlər qaldığı bir vaxtda əməliyyatda Türkiyənin iştirak edib-etməyəcəyi hələ də qaranlıq olaraq qalır.

Rəsmi Bağdadın qarşı olmasına baxmayaraq, Türkiyə əməliyyata qatılmaq istəyir. Türkiyə prezidenti Rəcəb Tayyib Ərdoğan Konyaya səfəri zamanı “B” və “C” planını hazırladıqlarını deyib.

“Mosul əməliyyatında koalisiya güclərinin içində olmaqda qərarlıyıq. Qəbul etməzlərsə, “B” və “C” planını tətbiq edəcəyik”, - Ərdoğan bildirib.

Bu gün diqqətlər həmçinin İrəvanda keçirilən Kollektiv Təhlükəsizlik Müqaviləsi Təşkilatının (KTMT) şura iclasına yönəlib.İclasda Rusiya, Qırğızıstan, Tacikistan, Belarus və Ermənistan prezidentləri iştirak edir. Qazaxıstan prezidenti Nursultan Nazarbayev xəstəliyinə görə İrəvana səfərini təxirə salıb. Onu ölkənin baş naziri əvəz edir.

Donbasda müharibə başladı

Rusiya prezidenti Vladimir Putin İrəvanda olduğu bir vaxtda Ukraynanın şərqində vəziyyət pisləşib.

Separatçı “Donetsk Xalq Respublikası”ndan (“DXR”) verilən məlumata görə, Ukrayna ordusu “DXR”in cənubunda hücuma keçiblər. Məlumata görə, hücumun qarşısı alınıb, Ukrayna 10 hərbçisini itirib. Bundan başqa Ukrayna ordusuna məxsus bir BMP və bir “Ural” avtomobilində olan silah-sursatın məhv edildiyi bildirilir.

Ömər Dağlı