Azərbaycanda əlilliyi olan şəxslər və 15 yaşı tamam olan sağlamlıq imkanları məhdud uşaqlar üçün yenilik olacaq. Lent.az-ın məlumatına görə, həmin şəxslərin məşğulluğunun təmin edilməsi məqsədilə işəgötürənlərə vergi və sığorta güzəştlərinin müəyyən olunması barədə təkliflər hazırlanacaq. Bu, əlilliyi olan şəxslərin hüquqlarının müdafiəsinə dair Milli Fəaliyyət Proqramında öz əksini tapıb.
Bununla bağlı Nazirlər Kabineti, Əmək və Əhalinin Sosial Müdafiəsi, Vergilər, Maliyyə, Ədliyyə nazirliklərinə tapşırıqlar verilib.
Bundan başqa, əlilliyi olan şəxslərin və sağlamlıq imkanları məhdud uşaqların həyat şəraitinin yaxşılaşdırılmasına yönəldilmiş həvəsləndirmə mexanizmlərinin tətbiq edilməsi ilə bağlı qanunvericilik təkmilləşdiriləcək. Bununla bağlı Nazirlər Kabineti, Vergilər, İqtisadiyyat və Sənaye, Əmək və Əhalinin Sosial Müdafiəsi, Ədliyyə nazirlikləri və Dövlət Sosial Müdafiə Fondu müvafiq işlər görəcək.