Halidey arxiyepiskopu Hanna Zora Tbilisinin "Holiday İnn" mehmanxanasında vəfat edib.
Milli.Az report-a istinadən bildirir ki, o, Tbilisiyə Roma Papası Fransisklə görüşə gəlibmiş.
Məlumata görə, mehmanxana rəhbərliyi arxiyepiskopun səhhətinin pisləşərək öldüyünü təsdiqləyib.
"Xadimənin sözlərinə görə, otaq qana bulaşmışdı. O, çoxlu qan itirmişdi. Xadimə hadisə ilə bağlı təhlükəsizlik xidmətinə gördüklərini söyləyib. Vatikan təmsilçiləri və Gürcüstan hüquq-mühafizə orqanlarının nümayəndələri hadisə yerinə gəldi. Onlar xadiməni sorğu-sual ediblər. Bundan sonra həmin işçi bu barədə heç nə danışmır", - Gürcüstanda çıxan "Prime time" qəzeti yazıb.
Faktla bağlı cinayət işi açılıb.
Xatırladaq ki, arxiyepiskop Hanna Zora 1939-cu il martın 15-də İraqın Tel-Keppe bölgəsinin Batnaia kəndində anadan olub. 1974-cü ildən İranın Əhvaz şəhərində arxiyepiskop təyin olunub. O, 1987-ci ildə İranı tərk edib. Həmin ildən Kanadada katolik kilsəsinin başçısı kimi fəaliyyət göstərirmiş.
Qeyd edək ki, Roma Papası Fransisk bu il sentyabrın 30-dan oktyabrın 1-dək Gürcüstanda, oktyabrın 2-də isə Azərbaycanda səfərdə olub.
Milli.Az