Kişineu. 25 oktyabr. REPORT.AZ/ Azərbaycan Mərkəzi Seçki Komissiyasının (MSK) nümayəndələri və Milli Məclisinin deputatı oktyabrın 30-da Moldovada keçiriləcək prezident seçkilərini müşahidə etmək üçün Kişineuya səfər edəcəklər.
Bu barədə "Report"un Şərqi Avropa bürosuna Moldova Mərkəzi Seçki Komissiyasından məlumat verilib.
Məlumata görə, MDB İcraiyyə Komitəsi missiyasının tərkibində Azərbaycan-Moldova Parlamentlərarası əlaqələr üzrə işçi qrupunun rəhbəri Sabir Hacıyev seçki prosesini izləyəcək. Bundan başqa, Azərbaycan MSK rəsmiləri Natiq Məmmədov və Ramin Nurəliyev də səsvermənin gedişini, vətəndaşların seçkilərdə fəallığına diqqət yetirəcəklər.
Moldova MSK-nın açıqladığı son məlumatlara görə prezident seçkilərini təqribən 450 beynəlxalq, 2300 yerli müşahidəçi izləyəcək.
Qeyd edək ki, 30 oktyabr seçkisi 1996-cı ildən bəri Moldovada ümumxalq səsverməsi ilə keçiriləcək ilk prezident seçkisi olacaq.
