Niderlandın Zeyland (Zeeland) bölgəsinin Zirikze
(Zierikzee) şəhərində Azərbaycanı tanıtmaq məqsədilə tədbir
keçrilib.
Publika.az xəbər verir ki, şəhər kinoteatrında baş tutan
təbdbir Niderlandda fəaliyyət göstərən “Connect” təşkilatının
təşkilatçılığı ilə keçirilib.
Niderlandda nəşr olunan “Vereldregio” (Wereldregio) qəzetinin baş
redaktoru Aad van der Vouden (Aad van der Wouden) tədbiri açıq elan
edib.
“Connect” təşkilatının sədri, soydaşımız Vüqar Abbasov çıxışından
sonra Sxouven Dəüveland (Schouwen Duiveland) bələdiyyəsinin başçısı
Xerard Rabelinkə (Gerard Rabelink) Azərbaycanla bağlı kitab hədiyyə
edib.
Bələdiyyə başçısı çıxışında soydaşımız Vüqar Abbasovala
tanışlığından və “Connect” təşkilatından danışaraq, bu təşkilatın
gələcəkdə bir çox uğurlara imza atacağına inamını dilə gətirib.
Daha sonra “Connect” təşkilatının katibi Vim van Embden (Wim van
Embden) Azərbaycanla bağlı görüntülü (powerpoint) təqdimat edib.
Tədbir iştirakçıları bu təqdimat sayəsində Azərbaycanın 1918-ci
ildən bu günə kimi olan tarixinə qısa nəzər salıblar.
Təqdimat zamanı zala toplaşanlara müstəqilliyimizi əldə edənə kimi
Azərbaycanda törədilən 20 Yanvar qırğını, Xocalı faciəsi barədə də
məlumat verilib. Vim van Embden özünün Azərbaycana səfərindən də
danışaraq qeyd edib ki, təəssüratları olduqca xoşdur. Daha sonra o,
Azərbaycanın gözəlliyindən, insanlarının qonaqpərvərliyindən,
tolerant ölkə olmasından və.s. söhbət açıb.
Tədbirdə Azərbaycanla bağlı qısa film nümayiş olunub. Film bitdikdən sonra iştirakçılara Azərbaycanla bağlı suallar verilib və cavabı düzgün tapanlara hədiyyə çekləri, Azərbaycana aid kitab təqdim olunub. Azərbaycanın işğal olunmuş əraziləri ilə bağlı xüsusi suala düzgün cavab verən şəxsə isə əlavə olaraq film izləmək üçün kinoya bilet hədiyyə edilib.
Bundan sonra isə Niderlandda yaşayan soydaşımız, nəqliyyat və
daşımaçılıq üzrə mütəxəssis Nurlan Ağayev təbdir iştirakçılarına
Azərbaycan iqtisadiyyatı, sərmayə qoymaq imkanları ilə bağlı
görüntülü təqdimat edib. Təqdimat, eyni zamanda, Azərbaycanın
turizm imkanlarını əhatə edib.
Nurlan Ağayev öz təqdimatında Azərbaycanın sərmayədarlar üçün
maraqlı, cəlbedici ölkə ola biləcəyinə diqqət çəkərək, zalda olan
iş adamlarını ölkəmizə sərmayə qoymağa dəvət edib.
N. Ağayev Azərbaycanın turizm imkanları ilə bağlı iştirakçılara
məlumat verib və niderlandlıların turizmə olan marağına toxunaraq
Azərbaycanda onların istirahəti üçün gözəl imkanlar olduğunu önə
çəkib. Təqdimatdan sonra qonaqlar skripkada, milli musiqi
alətlərimiz olan tarda, sazda Azərbaycan musiqilərini canlı ifada
dinləyiblər. Bundan sonra isə qonaqlar kinotetrın foyesində
Azərbaycan şirniyyatı, qutab və Azərbaycan şərablarını dadmağa
dəvət olunublar və bununla da tədbir sona çatıb.
Tədbirin əsas iştirakçıları Zeylandın müxtəlif istiqamətindən
gələn niderlandlılar olsa da, Sxouven Dəüveland bələdiyyəsində
yaşayan bir neçə soydaşımız da tədbirə qatılıblar. Bundan başqa
tədbirdə bir neçə yerli mətbuat orqanının nümayəndələri və bir çox
iş adamları, eyni zamanda Azərbaycanla biznes əlaqəsi qurmağa
maraqlı olan iş adamları, Niderlandın bir çox siyasi partiyalarının
yerli nümayəndələri və.s. iştirak ediblər.