Almaniyada sığınacaq axtaran Türkiyə vətəndaşlarının yalnız az bir qisminə qaçqın statusu və ölkədə yaşamaq üçün icazə verilir.
Milli.Az AZƏRTAC-a istinadən bildirir ki, bu məlumat "Die Welt" qəzetinin bugünkü nömrəsində Miqrasiya və Qaçqınların İşi üzrə Federal İdarənin məlumatına istinadla yayılıb. Qəzetdə idarənin bəyanatından sitat gətirilərək yazılıb: "Türkiyə vətəndaşlarının sorğuları üzrə müsbət həllərin sayı 2016-cı ilin yanvar ayından sentyabra qədər 6,7 faiz təşkil edir". 2015-ci ildə kömək üçün müraciət etmiş Türkiyə vətəndaşlarının 14,6 faizi sığınacaq alıb.
Qəzetdə vurğulanıb ki, eyni zamanda, sığınacaq barədə müraciətləri təmin edilməmiş Türkiyə vətəndaşlarının çoxu Almaniyada qalır. 2016-cı ilin birinci yarısında AFR-dən təxminən 100 adam Türkiyəyə deportasiya olunub.
Qeyd edək ki, Almaniyada sığınacaq axtaran türkiyəli vətəndaşların çoxu PKK terror təşkilatında iştirakına görə onları haqlı olaraq təqib edən Türkiyə Femidasından qaçır.
Milli.Az