Məşhur müğənni, şair və bəstəkar Leonard Kohenin ölüm səbəbi açıqlanıb.
Axşam.az-ın xarici KİV-ə istinadən məlumatına görə, keçən həftə 82 yaşında vəfat edən sənətçinin meneceri Robert Kori bu haqda danışıb. O, "Leonard Kohen noyabrın 7-də yuxuda olduğu zaman yatdığı yerdən yıxılaraq dünyasını dəyişib" deyib.
R.Kori ifaçının ölümünü "Ani, gözlənilməz və sakit" adlandırıb. Menecerin bu açıqlaması ilə Kohenin vəfatının ictimaiyyətə 3 gün sonra açıqlandığı üzə çıxıb.
L.Kohen noyabrın 10-da, yəni ölümünün açıqlandığı gün Kanadanın Montreal şəhərində təşkil edilən kiçik cənazə mərasimi ilə dəfn edilmişdi. Məşhur sənətçi üçün Los-Ancelesdə böyük bir anım tədbirinin keçiriləcəyi planlaşdırılır.