Düz bir əvvəl Azərbaycanın efir məkanına yeni səs, yeni nəfəs qədəm qoyan "ASAN Radio" 1 yaşını qeyd edir. Bir yaş efir məkanı üçün elə uzun yol olmasa da, "ASAN Radio" dövlət xidmətləri sayəsində ixtisaslaşan ilk və yeganə radio kimi xeyli məsafə qət edib.
Prezident İlham Əliyevin tapşırığı ilə yaradılan “ASAN Radio” 2015-ci il dekabrın 24-də yayıma başlayıb. Sosial, elm, idman, mədəniyyət və digər sahələrdə maraqlı, faydalı verilişlər hazırlayan “ASAN Radio” həm “ASAN Xidmət” mərkəzlərində təqdim olunan xidmətlər barədə dinləyiciləri ətraflı məlumatlandırır, həm də vətəndaşlarla dövlət qurumları arasında əlaqəni möhkəmləndirir. Xəbər istehsalçısı olan “ASAN Radio” məlumatları dinləyicilərə operativ şəkildə çatdırır.
“ASAN Radio” Bakı və Abşeron yarımadasında 100 FM tezliyində yayımlanır. Bundan başqa, radionu asanradio.az saytı vasitəsilə və xüsusi olaraq “ASAN Radio” üçün hazırlanan mobil tətbiqlərdən istifadə etməklə dinləmək mümkündür. Radionun dinləyici auditoriyası gündən günə genişlənir.
"OyanASAN" verilişinin aparıcısı Kəmalə Onur hər səhər 7.30-da dinləyicilərlə görüşə gəlir: "Düz bir ildir hər səhər saat 7.30 da dinləyicilərlə görüşə gəlirik. Demək olar ki, həyat ritmimiz dəyişib. Bu həm də gözəl əhval-ruhiyyə bəxş edir. Təbii ki, mütəmadi olaraq dinləyicilərlə ünsiyyətdə öz yerində"
Günay Aydınqızı dinləyicilərin efirdən tanıdığı xəbər aparıcısıdır: "Xəbər sistemində çalışmağı çox sevirəm . Orta məktəbdən başlayaraq həmişə bu sahədə çalışmaq arzum olub. Özümü burada dinləyiciyə daha yaxın, daha doğma hiss edirəm. Arzum odur ki, radiomuz 100 illiyini qeyd etsin, hər işi "ASAN" olsun".
Bir neçə ay öncə tamaşaçılarını ekrandan salamlayan İlkin Kərimli indi dinləyiciləri "ASAN Radio"nun efirindən salamlayır: "Mən jurnalist təcrübəmin böyük hissəsini televiziyada keçmişəm. Televiziya görüntünü, radio isə səsi sevdiyindən dinləyicilərlə səslə işləyirik. Az bir zamandır burdayam, amma burada olduğuma da çox şadam. Bu radionun adında "ASAN" brendi var. "ASAN" vətəndaş məmnunluğudur. Ona görə də çalışırıq ki, "ASAN Xidmət"lə vətəndaşlar arasında bir körpü rolunu oynayaq".
Bu gün dövlət xidmətləri sahəsində ixtisaslaşan ilk və yeganə radio olan "ASAN Radio"ya media-tur təşkil olunub, jurnalistlərə "ASAN Radio"da yaradılan şərait barədə məlumat verilib. Eyni zamanda media nümayəndələri radionun iş prosesi ilə tanışlıq imkanı tapıb, "ASAN News", gənclər və idman redaksiyası, efir otağı, musiqi verilişləri departamenti və digər redaksiyalarda olublar.
"ASAN Radio"nun direktoru Emin Musəvi jurnalistlərə iş prosesi barədə ətraflı məlumat verib: "Biz yeni üsullar əsasında işləyirik. Həm proqram və verilişlərə, həm xüsusi reportajlara, həm də radioçarxlara üstünlük veririk. Biz özümüz də xəbər istehsal etməyə çalışırıq. “ASAN Radio” həm də gələcəyin media işçilərini yetişdirir. "ASAN könüllüləri" burada "Master-2" proqramı çərçivəsində təcrübə keçir, mediaya aid müxtəlif peşələri öyrənirlər. Onlar iş prosesində də iştirak edirlər. Artıq könüllülərin bir neçəsi "ASAN Radio"da işə götürülüb. Könüllülərlə bir yerdə radionun 30 əməkdaşı var".
Emin Musəvinin rəhbərlik etdiyi "ASAN Radio"ya öz arzuları var: "Arzu edirəm ki, dinləyicilərimiz üçün hər zaman aktual olaq. Dövlət qurumları ilə bağlı xidmətlər bizim üçün prioritetdirsə, dinləyiciləri digər istiqamətlərdə maarifləndirmək də əsas missiyamızdır. İstəyirik ki, bunu hər zaman peşəkarcasına həyata keçirək”.
1 yaşı tamam olan "ASAN Radio"sunda yeni-yeni uğurlar diləyir, həmkarlarımızı təbrik edirik. İşiniz "ASAN", başarılarınız daimi olsun!