İvanovka — bu kənd çoxlarına Sovet dövrünü xatırladır. İsmayıllı rayonunun bu kəndinin əsrlərdir davam edən özünəməxsus adət-ənənələri, insanların yaşam tərzi, onu Azərbaycanın digər kəndlərindən fərqləndirir.
İvanovkanın arxitekturası da heyrətamizdir. Yolboyu evlər, sanki
xətkeşlə çəkilmiş kimi simmetrik və səliqəlidir. Sputnik-ə danışan
kənd sakini Mixail Jabin deyir ki, burada fəhlənin də, sürücünün
də, kolxoz sədrinin də evi bir-birindən fərqlənmir: "Gördüyünüz
tək-tük dəbdəbəli evlər imkanlı paytaxt sakinlərinə məxsusdur.
Bakıdan gəlib İvanovkada yer alıb, ev tikiblər".
"İvanovkada hazırda ruslarla yanaşı, ləzgilər, qazaxlar və qismən
də azərbaycanlılar yaşayırlar. Ayrı-ayrı millətlərin nümayəndələri
bir kənddə yaşasalar da, milli-mənəvi dəyərlərinə görə xeyli
fərqlənirlər. Burada insanlar ailə dəyərlərinə daha çox önəm
verirlər. Demək olar ki, çox nadir hallarda rus qızları başqa
millətlərin nümayəndələri ilə ailə həyatı qururlar", — sakin
bildirir. Dediyinə görə, ivanovkalılar dünyagörüşü baxımından heç
də paytaxt sakinlərindən seçilmirlər: "İvanovka rusları dəbdəbədən
uzaqdırlar. Onlar ata-babalarının əsrlər əvvəl qoyduğu milli
ənənələrini qoruyub saxlamağı özlərinə borc bilirlər". İvanovkada
evlərin tikilişindən tutmuş, insanların dünyagörüşünə, qonaqlara
davranışına kimi hər şey tam fərqlidir. Bu mənzərənin canlı şahidi
olarkən təəccüb içində idim. Sanki Azərbaycanda deyil, hansısa
sivil Avropa ölkəsindəydim. Yol kənarında səliqə ilə tikilən
balaca, səliqəli evlər, təmiz küçələr, sözün əsl mənasında bizi
valeh etmişdi. Kənd deyəndə — palçıq, toz-torpaq, yolun ortasında
mələyən qoyun-quzu gözümüzün önündə canlansa da, İvanovkada bunları
görmədim. Habelə, İvanovkanın təbiəti kimi insanları da soyuqdur
desəm, yanılmaram. Mixail Jabin İvanovkanın tarixi haqqında da
danışdı: "İvanovkanın tarixi zəngindir. Kəndin əsası 1847-ci ildə
çar Rusiyası dövründə, Qafqaza köçürülmüş ruslar tərəfindən
qoyulub. Kəndin adı, onun yaradıcısı olan kəndçi İvan Perşinin
şərəfinə İvanovka adlandırılıb. Burada, orta hesabla 3 mindən çox
insan yaşayır. İvanovkalılar daha çox üzümçülük, taxılçılıq və
heyvandarlıqla məşğul olurlar. Bu kəndin çaxır, pendir və s. kimi
məhsulları daxili bazarda öz yerlərini tutub. Kənddə bir neçə sex
və park fəaliyyət göstərir". Qeyd edək ki, 1996-cı ildə torpaq
islahatı həyata keçirilən zaman kolxozda işləyənlər birgə qərar
veriblər ki, kolxoz dağılmasın. Burada yaşayan ruslar, ləzgilər
birgə təsərrüfatçılıq sistemi daxilində fəaliyyət göstərməyin
tərəfdarı olduqlarını deyiblər. Kolxoza, həmin təsərrüfata 41 il
rəhbərlik etmiş Nikolay Vasilyeviç Nikitinin adı verilib.