Dekabrın 22-də Qaradağ rayonunun Lökbatan qəsəbəsi ərazisində yerləşən ticarət mərkəzlərindən birində Bakı şəhər sakini Ehtimad Hüseynova məxsus mağazadan 800 manat pul oğurlamaqda şübhəli bilinən şəxs ələ keçib.
Lent.az Daxili İşlər Nazirliyinin ( DİN ) saytına istinadən bildirir ki, oğurluqda şübhəli bilinən paytaxt sakini Ümid Qarayev Qaradağ Rayon Mühafizə İdarəsinin əməkdaşları tərəfindən saxlanılaraq 10-cu PB-yə təhvil verilib.
Bundan başqa, Şabran RPŞ əməkdaşlarının həyata keçirdikləri əməliyyat-axtarış tədbirləri nəticəsində noyabrın 28-də rayon sakini Kamran Əmrahova məxsus mağazadan 484 manat pul oğurlamaqda şübhəli bilinən həmyerliləri - Fərman İsbatov və Elçin Abdullayev də tutulublar.
Bakı şəhər sakini Xaləddin Əliyev isə dekabrın 22-də Sabunçu rayon ərazisində 3 evdən pul və məişət əşyaları oğurlamaqda şübhəli bilindiyi üçün Sabunçu RPİ 12-ci PB əməkdaşlarının həyata keçirdikləri əməliyyat-axtarış tədbirləri nəticəsində saxlanılıb .
