Azərbaycanda külli miqdarda narkotik vasitələr aşkar edilib. Daxili İşlər Nazirliyinin mətbuat xidmətindən ANS PRESS-ə verilən məlumata görə, əməliyyat müxtəlif yerlərdə keçirilib.
Belə ki, Bakı şəhər Baş Polis İdarəsinin Narkotiklərlə Mübarizə İdarəsi əməkdaşlarının həyata keçirdikləri əməliyyat-axtarış tədbirləri nəticəsində Sabirabad rayon sakini Nağı Həmidovdan 5 kiloqram 100 qram marixuana götürülüb.
Digər əməliyyat Sumqayıt şəhər Polis İdarəsi 3-cü polis bölməsi əməkdaşları tərəfindən keçirilib. Həyata keçirilən əməliyyat-axtarış tədbirləri nəticəsində şəhər sakini, əvvəllər məhkum olunmuş Çingiz Səfxanovdan 2 kiloqram 200 qram marixuana götürülüb.
Abşeron rayon polis şöbəsi əməkdaşlarının həyata keçirdikləri əməliyyat-axtarış tədbirləri nəticəsində Gəncə şəhər sakini, əvvəllər məhkum olunmuş Elvin Salahovdan 5 kiloqram 18,7 qram marixuana götürülüb.
Daha bir irimiqyaslı əməliyyat isə Gəncədə keçirilib. əməliyyat Gəncə şəhər Baş Polis İdarəsi əməkdaşları tərəfindən təşkil olunub. Həyata keçirdikləri əməliyyat-axtarış tədbirləri nəticəsində şəhər sakini Elçin Əliyevdən 13,5 qram marixuana götürülüb. Onun Gəncə şəhərində kirayədə yaşadığı evə baxış zamanı isə 15 kiloqram 200 qram marixuana aşkar edilərək götürülüb.