Bakı. 2 fevral. REPORT.AZ/ Bu gün 2 fevral - Gənclər Günündə Prezident İlham Əliyevin 27 yanvar 2017-ci ildə imzaladığı sərəncam ilə 6 nəfər gəncə verilən "Gənclər üçün prezident mükafatı"nın təqdimatı olub.
Tədbirdə gənclər və idman naziri Azad Rəhimov, təhsil naziri Mikayıl Cabbarov, mədəniyyət və turizm naziri Əbülfəs Qarayev və digər rəsmi şəxslər iştirak ediblər.
Nazir Azad Rəhimov bildirib ki, bu gün gənclər üçün böyük bir bayramdır: “Bu gün Azərbaycanda Gənclər Gününün qeyd olunmasının 20-ci ildönümüdür. Bu, böyük bir yoldur. Biz bu müddət ərzində çox işlər görmüşük. Azərbaycan gənclər siyasəti sahəsində dünyəvi bir model yaradıb və bu model dünya ölkələrində, beynəlxaq təşkilatlarda qəbul olunur. Gənclər Prezidentin ətrafında birləşib və parlaq Azərbaycan naminə çalışırlar. Bizim gəncliyimiz həmişə öndə olacaq, Ulu Öndərin ideyaları həyata keçəcək”.
Tədbirdə uğur qazanan istedadlı və yaradıcı gənclərin mükafatlandırılması da baş tutub. Bu il 28 yaradıcı və istedadlı gənc nazirlik tərəfindən mükafatlandırılıb. Bundan əlavə, keçən ildəki uğurlu fəaliyyətlərinə görə Gənclər Günü münasibəti ilə bir sıra gənclər təşkilatları və tələbə gənclər təşkilatı da təltif olunub.
Qeyd edək ki, hər il fevralın 2-si Gənclər Gününün qeyd olunması münasibəti ilə elm, təhsil, mədəniyyət və incəsənət sahəsində nailiyyət qazanan, respublikamızı xarici ölkələrdə yüksək səviyyədə təmsil edən yaradıcı və istedadlı gənclərin stimullaşdırılması məqsədilə Gənclər və İdman Nazirliyi tərəfindən mükafatlar təqdim olunur.
