Gəncə, 16 mart, AZƏRTAC
Gəncədə Azərbaycan Qızıl Aypara Cəmiyyətinin təşkilatçılığı ilə “Qan donorluğunun inkişafına dəstək” adlı seminar-müşavirə keçirilib. Seminar-müşavirədə yüzdən artıq universitet tələbəsi, qeyri-hökumət təşkilatlarının və Azərbaycan Qızıl Aypara Cəmiyyətinin nümayəndələri iştirak ediblər.
Azərbaycan Qızıl Aypara Cəmiyyətinin proqram rəhbəri Mətanət Qaraxanova AZƏRTAC-a deyib ki, seminar-müşavirənin keçirilməsində əsas məqsəd gənclərin bu sahəyə marağını artırmaq, irsi qan xəstəliklərindən əziyyət çəkənlərə yardım edilməsində onların fəallığını artırmaqdır.
Seminar-müşavirənin sonunda donorluqla bağlı videoçarx nümayiş etdirilib, iştirakçılara maarifləndirici bukletlər paylanıb.