Avropadakı azərbaycanlılar əməkdaşlığı gücləndirirlər - Qurultay olacaq

Avropadakı azərbaycanlılar əməkdaşlığı gücləndirirlər - Qurultay olacaq
12:27 24 Fevral 2017
63 Dünya
Ölkə mətbuatı
A- A+

Fevralın 27-də Niderland Krallığının Amsterdam şəhərində Avropa Azərbaycanlıları Konqresinin (AAK) V Qurultayı keçiriləcək.

Diasporla İş üzrə Dövlət Komitəsindən Milli.Az-a verilən məlumata görə, qurultayda AAK prezidenti Samira Patzer-İsmailovanın ötən qurultaydan keçən müddət ərzində görülmüş işlərə dair hesabat məruzəsi dinləniləcək. Daha sonra qurultay nümayəndələri və qonaqlar çıxış edərək AAK-ın ötən dövrdəki fəaliyyətinə, təşkilatın qarşısında duran vəzifələrin icrasına qiymət verəcəklər. Tədbirdə AAK-ın rəhbər orqanlarına seçkilər keçiriləcək, həmçinin bir sıra sənədlər, o cümlədən AAK-ın V Qurultayının qətnaməsi qəbul ediləcək.

Qurultay çərçivəsində Avropada fəaliyyət göstərən Azərbaycan diaspor təşkilatları arasında əməkdaşlığın inkişafı sahəsində qarşıda duran vəzifələr, Azərbaycan həqiqətlərinin dünyaya çatdırılmasının yeni metod və texnologiyaları barədə müzakirələrin aparılması, AAK-a yeni üzv-təşkilatların qəbulu da planlaşdırılır.

Tədbirdə əksəriyyəti Niderland, Almaniya, İsveç, Rusiyadan olmaqla Avropanın 27 ölkəsindən 91 nümayəndənin iştirakı nəzərdə tutulub. Qurultayda AAK-a üzv təşkilatların rəhbərlərinin, Azərbaycan Respublikasının dövlət və hökumət nümayəndələrinin, millət vəkillərinin, xarici ölkə deputatlarının, o cümlədən Niderland Krallığının parlament üzvlərinin, AAK-a üzv olmayan Azərbaycan cəmiyyət və birliklərinin, həmçinin, digər xalqların diaspor təşkilatlarının təmsilçilərinin iştirakı gözlənilir.

Qurultay nümayəndələri və qonaqlar yaşadıqları ölkələrin ictimai, siyasi, iqtisadi və mədəni həyatında fəal iştirak edən, Azərbaycan həqiqətlərinin dünya ictimaiyyətinə çatdırılması işinə daim dəstək verən tanınmış alimlər və ziyalılar, siyasi və ictimai xadimlərdir.

Qeyd edək ki, AAK 2004-cü il aprelin 17-də Berlində keçirilən toplantıda təsis edilib. Avropa Azərbaycanlıları Konqresində Avropanın 27 ölkəsindən 60-dan artıq diaspor təşkilatı təmsil olunur.

İlkin İzzət

Milli.Az

Digər maraqlı xəbərlər Milli.Az-ın Facebook səhifəsində


Xəbərin orijinal ünvanı: http://news.milli.az/world/520815.html

Şahid olduğunuz hadisələrin video və ya fotosunu çəkərək bizə göndərin:
0552252950 (Whatsapp)

BU KATEQORİYADAN DİGƏR XƏBƏRLƏR