Bakı-Sumqayıt yolundakı faciəvi qəzada ağır yaralanandan sonra komadan ayılmayan Lalə Nəsibzadənin qardaşı bacısının yoxluğuna alışa bilmir.
Publika.az xəbər verir ki, o, yol qəzasında rəhmətə gedən Laləni xatırlayaraq kədərini belə ifadə edib:
"Mən Nəsibəm, Sumqayıt şossesində baş vermiş qəzada komadan ayılmayıb rəhmətə gedən Lalənin qardaşı. O qardaş ki bu 18 ildə nə bir qardaş kimi qardaşlıq eləməmiş, nə ona doyunca günlər yaşatmamış. O qardaş ki axırıncı dəfə çatdırıb üzünü görə bilmədim. Allahdan 8 martda zəng edib səsini eşidə bilmişdim son dəfə. Amma nə biləydim bu sondur. Həqiqətən insan hər şeyin qədrini itirəndən sonra bilir. Demirəm ki, qədrini bilməmişəm, demirəm ki nəyisə əsirgəmişəm ondan, xeyr, amma nə bilim, kimsə onun haqqında soruşanda belə heç kimə adını belə deməyəcək qədər qıymırdım. İlk dəfədir ki, bacımla bir şəkil paylaşıram, heç ağlıma gəlməzdi, həmçinin belə vəziyyətdə. Nə deyim, nələr deyim ki, ürəyim boşalsın. Allah köməyimiz olsun, başqa heç nə". (big.az)
