"Bakıda keçiriləcək idman gimnastikası üzrə Dünya kubokunda rəqabət çox yüksək olacaq".
Milli.Az xəbər verir ki, bunu Trend-ə Türkiyə nümayəndə heyətinin rəhbəri İsmayıl Göktekin deyib.
O, yarışlarda Yaponiya, Çin, İsrail və Ukraynadan güclü idmançıların iştirak edəcəyini deyib: "Fikrimcə, rəqabət həm kişilər, həm də qadınlar arasında çox yüksək olacaq. Demək olar ki, burada kiçik dünya çempionatı keçiriləcək".
İ.Göktekin qeyd edib ki, öz idmançılarının yaxşı nəticələrinə ümid edir: "Biz Bakıya 6 kişi və 4 qadın olmaqla 10 gimnast gətirmişik. Sabah və birigün onlar təsnifat yarışlarında çıxış edəcək. Ümid edirəm ki, yaxşı nəticə göstərəcəklər. Finala çıxmaq asan olmayacaq, amma biz bu tapşırığın öhdəsindən gələcəyik".
O, Azərbaycana yüksək səviyyəli təşkilatçılıq və qonaqpərvərliyə görə minnətdarlığını bildirib. "Hotellərdən tutmuş idman zalındakı şəraitə kimi qardaş Azərbaycanda təşkilatçılıq çox yüksək səviyyədədir. Fikrimcə, idmançılar gözəl mühitdə mübarizə aparacaqlar. Mən əvvəlcədən Azərbaycanı Dünya kubokunun yüksək səviyyədə təşkilinə görə təbrik etmək istəyirəm".
Tərkibində 21 nəfər olan Türkiyə nümayəndə heyəti Dünya Kubokunda iştirak edən ən çoxsaylı nümayəndə heyətidir.
Qeyd edək ki, 16-19 mart tarixlərində Bakıda Milli Gimnastika Arenasında kişi və qadın idman gimnastikası üzrə FIG Dünya Kuboku mərhələsi keçiriləcək. Artıq ikinci ildir ki, paytaxtımızın ev sahibliyi etdiyi bu turnirdə 23 ölkədən ümumilikdə 85 kişi, 35 qadın idmançının çıxışı gözlənilir.
Turnirin ilk 2 günü təsnifat mərhələləri, son 2 günü isə ayrı-ayrı alətlər üzrə finallar baş tutacaq. Yeni Olimpiya dövrünün 2017-ci ildən qüvvəyə minən yeni qaydaları əsasında kişi gimnastlar 6, qadın gimnastlar isə 4 dəst medal uğrunda mübarizə aparacaqlar.
Məşhur kişi idmançılar arasında Olimpiya çempionları Elefterios Petrunias (Yunanıstan), Kristian Berki (Macarıstan), Olimpiya Oyunlarının gümüş mükafatçısı Filip Ude (Xorvatiya) və Avropa çempionu Aleksandr Şatilov (İsrail) peşəkar çıxışları ilə hər kəsi heyran edəcəklər.
Qadın idmançılar arasında isə 3 qat Olimpiya çempionu Katalina Ponor (Rumıniya) və Olimpiya Oyunlarının qızıl medalçısı Oksana Çusovitina (hazırda Özbəkistanı təmsil edir) kimi məşhur gimnastlar yer alacaqlar.
Ölkəmizi kişi idman gimnastikası üzrə yarışlarda Murad Ağarzayev, Bense Talas, qadın idman gimnastlarının turnirində isə Yuliya İnşina, Marina Nekrasova, Mariya Smirnova və Yekaterina Tişkova təmsil edəcəklər.
Milli.Az
Digər maraqlı xəbərlər Milli.Az-ın Facebook səhifəsində 
