Prezident İlham Əliyevin Fransa səfəri iki ölkə
arasındakı münasibətlərin inkişafında mühüm əhəmiyyət kəsb edirdi.
Fransa-Azərbaycan münasibətlərinin qurulmasından 25 il ötür və bu
müddət ərzində ikitərəfli əlaqələr yüksələn xətt üzrə inkişaf edib.
Azərbaycan Prezidentinin Fransada qarşılanma mərasimi, keçirdiyi
görüşlər də Parisin Bakıya xüsusi önəm verdiyini açıq şəkildə
göstərir.
Publika.az xəbər verir ki, Prezident İlham Əliyevin Fransa
səfəri bir sıra aspektdən əhəmiyyətli idi.
Azərbaycan Prezidentinin Fransa səfəri bu ölkənin biznes
dairələrində maraqla qarşılandı. Dövlət başçısı Parisdə “Total”,
“Thales İnternational”, “Airbus”, “CİFEL”, DCNS, “Credit Agricole
SA”, “Vivaction”, “SEUZ” kimi nəhəng şirkətlərin rəhbərləri ilə
təkbətək görüşlər keçirtdi. Hər bir şirkətlə müəyyən müqavilələr
imzalandı. Bu, Azərbaycana yenin investisiyaların cəlb edilməsi
baxımdan mühümdür.
Bu gün Azərbaycanda 50-dən çox fransız şirkəti uğurla fəaliyyət
göstərir və Azərbaycan iqtisadiyyatına yatırılan investisiyaların
həcmi 2 milyard dollardan çoxdur. Bu, həm Azərbaycanın
potensialını, həm də fransız biznes dairələrinin Azərbaycanda
fəaliyyət göstərməyə marağını nümayiş etdirir. Təbii ki, burada
əsas faktor Azərbaycanda əlverişli biznes və yüksək investisiya
mühitinin, ölkənin böyük inkişaf potensialının olmasıdır. Məhz bu
amillər dünyanın aparıcı iqtisadi və maliyyə qurumlarının diqqətini
cəlb edir. Azərbaycanın həyata keçirdiyi siyasət regionda yeni
reallıq və qonşularla yeni əməkdaşlıq formatı yaradıbdır. XXI əsrin
layihəsi olan Cənub Qaz Dəhlizi layihəsi Avropanın enerji
xəritəsini dəyişir və Avropa istehlakçıları üçün yeni təbii qaz
mənbəyidir. Əlverişli coğrafi mövqeyə malik, Asiya və Avropanın
arasında yerləşən və müasir nəqliyyat infrastrukturuna malik
Azərbaycan regionun nəqliyyat qovşağına çevrilibdir. Azərbaycan
Ermənistan-Azərbaycan, Dağlıq Qarabağ münaqişəsinin həllində
Fransanın göstərdiyi səyləri yüksək qiymətləndirir və Dağlıq
Qarabağ münaqişəsinin beynəlxalq hüququn norma və prinsipləri
əsasında tezliklə həllinin tərəfdarıdır. Azərbaycan istəyir ki,
Dağlıq Qarabağ münaqişəsi ilə bağlı status-kvo dəyişdirilsin,
münaqişəyə son qoyulsun, bölgədə sülh təmin edilsin.
Prezident İlham Əliyev Fransa səfərində narahatlıq doğuran bir
məsələni də diqqətə çatdırdı. Belə ki, bəzi xarici şirkətlər
Azərbaycanın işğal olunmuş ərazilərində risk altında, qanunsuz
fəaliyyət göstərir. Həmin ərazilərdə qanunsuz fəaliyyət göstərən
şirkətlər bu fəaliyyətlə bağlı riskləri göz altına almalı və belə
fəaliyyətdən çəkinməlidirlər. Bəzi Fransa şirkətlərinin həmin
ərazilərdə iş qurması Azərbaycanla Fransa arasında dost
münasibətlərinə uyğun deyil.
Politoloq Fikrət Sadıqov Publika.az-a
açıqlamasında bildirib ki, Fransa və Azərbaycan arasında
konstruktiv münasibətlər mövcuddur: “Fransua Ollandın dəvəti ilə
İlham Əliyevin Parisə səfər etməsi hər iki ölkənin maraqlarına
cavab verir. Parisdə prezidentlər ikitərəfli münasibətlərin daha da
inkişaf etdirilməsinə qərar verdilər. Bununla yanaşı, Fransa
ATƏT-in Minsk qrupunun həmsədr ölkəsidir və onun Qarabağla bağlı
mövqeyi əhəmiyyətlidir. Münaqişənin həll olunmasında onun da
mövqeyindən çox şey asılıdır”.
Politoloq Prezident İlham Əliyevlə Fransua Ollandın görüşündə
Fransa prezidentinin “status-kvo qəbuledilməzdir” sözlərinə diqqət
çəkib.
“Bu əhəmiyyətli məqamdır. Olland bu sözlərlə öz ölkəsinin siyasi
elitasının ümumi fikrini ifadə edir. Azərbaycan Prezidenti də
Fransada ölkəmizin mövqeyini aydın şəkildə ortaya qoydu”, - deyə o
vurğulayıb.
Publika.az