Bakıdakı Milli Gimnastika Arenası mənim indiyə qədər çıxış etdiyim ən yaxşı stadiondur.
Milli.Az xəbər verir ki, bunu Trend-ə yunan gimnastı, Olimpiya çempionu və Birinci Avropa Oyunlarının qalibi Elefterios Petrunias deyib.
O, iki ildən sonra yenidən burada olmaqdan məmnunluq duyduğunu bildirib: "Mənim bu arena ilə bağlı xoş xatirələrim var. Mən məhz burada Birinci Avropa Oyunlarının qalibi olmuşam. Turnir ərəfəsində çox həyəcanlıyam. Bu, nüfuzlu yarışdır, təşkilatçılıq isə Bakıda hər zaman yüksək səviyyədədir".
Gimnast özünün yaxşı formada olduğunu hesab edir: "Mən burada Riodakından daha yaxşı çıxış etmək istəyirəm. Görək, necə olacaq. Zalda işıqlandırma əvvəlkilərdən fərqlənir. Böyük bir şou olacaq. Bu, tamaşaçıların cəlb olunması üçün yaxşıdır. Bu yarış mənim üçün Olimpiya oyunlarından sonra ilk yarışdır. Bu cür hallarda gözləntilər yüksək olur".
O qeyd edib ki, gələcək planları gələn ay Rumıniyada Avropa çempionatında iştirak etmək, daha sonra dincəlmək və Kanadada keçirilən Dünya Çempionatına hazırlaşmaqdır.
E.Petrunias deyib: "Məşqçi ilə çıxışımın detalları üzərində çalışırıq. Bu Dünya Kuboku Avropa Çempionatı və Dünya Çempionatı kimi yarışlar üçün yaxşı hazırlıqdır. Çünki burada Avropa Oyunları keçirilmiş böyük arena var. Ümumiyyətlə, bu arena mənim çıxış etdiyim ən yaxşı arenadır".
Qeyd edək ki, 16-19 mart tarixlərində Bakıda Milli Gimnastika Arenasında kişi və qadın idman gimnastikası üzrə FIG Dünya Kuboku mərhələsi keçiriləcək. Artıq ikinci ildir ki, paytaxtımızın ev sahibliyi etdiyi bu turnirdə 23 ölkədən ümumilikdə 85 kişi, 35 qadın idmançının çıxışı gözlənilir.
Turnirin ilk 2 günü təsnifat mərhələləri, son 2 günü isə ayrı-ayrı alətlər üzrə finallar baş tutacaq. Yeni Olimpiya dövrünün 2017-ci ildən qüvvəyə minən yeni qaydaları əsasında kişi gimnastlar 6, qadın gimnastlar isə 4 dəst medal uğrunda mübarizə aparacaqlar.
Məşhur kişi idmançılar arasında Olimpiya çempionları Elefterios Petrunias (Yunanıstan), Kristian Berki (Macarıstan), Olimpiya Oyunlarının gümüş mükafatçısı Filip Ude (Xorvatiya) və Avropa çempionu Aleksandr Şatilov (İsrail) peşəkar çıxışları ilə hər kəsi heyran edəcəklər.
Qadın idmançılar arasında isə 3 qat Olimpiya çempionu Katalina Ponor (Rumıniya) və Olimpiya Oyunlarının qızıl medalçısı Oksana Çusovitina (hazırda Özbəkistanı təmsil edir) kimi məşhur gimnastlar yer alacaqlar.
Ölkəmizi kişi idman gimnastikası üzrə yarışlarda Murad Ağarzayev, Bense Talas, qadın idman gimnastlarının turnirində isə Yuliya İnşina, Marina Nekrasova, Mariya Smirnova və Yekaterina Tişkova təmsil edəcəklər.
Milli.Az
Digər maraqlı xəbərlər Milli.Az-ın Facebook səhifəsində 
