Bakı. 2 may. REPORT.AZ/ Türkiyə prezidenti Rəcəb Tayyib Ərdoğan 979 gündən sonra yenidən hakim Ədalət və İnkişaf Partiyasına (AKP) üzv olub.
“Report” "Anadolu" agentliyinə istinadən xəbər verir ki, o, mayın 2-də AKP-nin Türkiyə Böyük Millət Məclisindəki fraksiyasının toplantısında çıxış edib.
Qeyd edək ki, R.T.Ərdoğan 2001-ci il avqustun 14-dən 2014-cü il avqustun 27-dək bu partiyanın üzvü olub. O, prezident seçildikdən sonra qanunun tələbi ilə AKP-dən çıxıb.
Konstitusiyaya edilən dəyişikliklərə əsasən, artıq Türkiyə prezidenti siyasi partiyaya üzv ola bilər. Fövqəladə qurultayda Türkiyə Prezidenti Rəcəb Tayyib Ərdoğanın yenidən AKP sədri olması məsələsinə baxılacaq.
Xatırladaq ki, 1960-cı il mayın 27-dək Türkiyə prezidenti partiyalı olub. 1961-ci ildə qəbul edilən yeni konstitusiyaya ölkə prezidentinin partiya mənsubiyətinin olmaması haqda maddə təsbit edilib. 1982-ci ildəki Əsas Qanunda da bu maddə qorunub.
Türkiyənin siyasi tarixində ilk prezidenti Mustafa Kamal Paşa Atatürk də həm partiya sədri, həm də prezident olub.