Azərbaycan millisinin hücumçusu Renat Dadaşovun formasını geyindiyi "Ayntraxt" klubu Almaniya futbolunda yeniliyə imza atıb.
Milli.Az apasport.az-a istinadən xəbər verir ki, Frankfurt təmsilçisi qadın skaut Helena Kosta ilə anlaşıb.
Bu isə o deməkdi ki, gələn mövsüm Bundesliqa matçlarına baş hakim kimi təyinat alacaq Bibana Steynhaus elitadakı yeganə qadın olmayacaq. Helena Kosta da Bundesliqa tarixinə ilk qadın skaut kimi düşəcək.
10 ildən çox "Benfika"da çalışan portuqaliyalı mütəxəssis ölkəsində "ətəkli Mourinyo" kimi tanınır. "Ayntraxt"ın futbol direktoru Fredi Bobiç yeni skautun futbolun yalnız kişilərə aid idman növü olduğunu düşünənləri yanıldacaq təcrübəyə malik olduğunu söyləyib: "Helena futbolu çox yaxşı bilir, zəngin təcrübəsi var. İstedadlı futbolçular kəşf edəcəyimiz ölkələrdə yaşamış skautlar axtarmaqda davam edirik".
Uzun müddət "Benfika"nın aşağı yaş qruplarında məşqçilik etmiş 39 yaşlı Kosta bir neçə oyunçunun üzə çıxmasında müstəsna rol oynayıb. Marko Fabian, Karlos Salsedo, David Abraham və Xesus Valyexo kimi futbolçular özlərini məhz ona borclu bilirlər. A kateqoriyalı məşqçi lisenziyası olan mütəxəssis müxtəlif vaxtlarda Fransa, Qətər, Şotlandiya və İranda da fəaliyyət göstərib.
Milli.Az
