Ermənistan prezidenti Serj Sarkisyan Nyu-Yorkda
keçirilən BMT Baş Assambleyasında çıxışı zamanı Azərbaycan və
Türkiyədən şikayətlənib.
Publika.az xəbər verir ki, Sarkisyan işğal edilmiş
Azərbaycan torpaqlarında yaradılan qondarma “DQR” rejimini müstəqil
göstərməyə cəhd edərək, “Qarabağ xalqı”nın pis vəziyyətdə olduğunu
deyib. Həmçinin, Azərbaycanın hərbi gücündən qorxduqlarını etiraf
edərək, onları qorumaq üçün dünyaya yalvarıb.
Daha sonra erməni prezident qondarma “erməni soyqırımı”na görə
Türkiyəni ittiham edib. Həmçinin, Türkiyə-Ermənistan sərhədlərinin
açılması ilə bağlı 2009-cu ildə imzalanan Surix protokollarının
yerinə yetirməməsindən şikayətlənib.
“Bu sənədlər indiyə qədər təsdiqlənməyib və Ankara bizə qarşı ilkin
şərtlər irəli sürür”, - deyə o bildirib.
Qeyd edək ki, Türkiyə Azərbaycan torpaqlarının işğaldan azad
ediləcəyi təqdirdə sərhədlərin açılmasını nəzərdə tutam Surix
protokollarını ratifikasiya edəcəyini bəyan edir.
Sarkisyan isə bundan şikayətlənərək, absurd təhdidlə çıxış edib.
Bildirib ki, 2018-ci ildə Ermənistan bu sənədləri dəyərsiz hesab
edəcək.
Asif
