Azərbaycan təhsilində yeni dövr: Bu məktəb binalarını istənilən formaya salmaq olur - FOTOLAR

Azərbaycan təhsilində yeni dövr: Bu məktəb binalarını istənilən formaya salmaq olur - FOTOLAR
11:23 21 Sentyabr 2017
116 Ölkə
Ölkə mətbuatı
A- A+

Təhsil Nazirliyi tərəfindən sentyabr ayının 20-si Qəbələ və Oğuz rayonlarına mediatur təşkil edilib. Mediaturda 25 nəfərdən çox media nümayəndəsi iştirak edib. Jurnalistlər bölgədə inşa edilən yeni modul tipli məktəblərlə tanış olub.

Rayonun ucqar kəndlərində yaşayan ailələr uşaqlarını məktəbə gətirib-aparmaqda çətinlik çəkir. Bir tərəfdən qış, soyuq havalar, şəraitsiz uzaq yol uşaqların məktəbə getməsinə mane olurdusa, digər tərəfdən də məktəblərin qəzalı vəziyyətdə olması, otaqların şəraitsizliyi şagirdlərin xəstələnməsinə səbəb olurdu. Bu da təbii olaraq dərslərdən geri qalan şagirdlərin təhsil səviyyəsini aşağı salırdı.

Elə bu səbəbdən də Təhsil Nazirliyinin təşəbbüsü ilə Qəbələnin Seyidqışlaq, Cığatelli, Oğuzun Qarabaldır, Xalxalqışlaq, Yemişənli kəndlərində modul tipli məktəblər inşa edilib.

Tur iştirakçıları ilk olaraq Qəbələnin Seyidqışlaq kəndinə yola düşüb. Burada inşa edilən modul tipli ümümi orta məktəblə tanış olduq. 82 şagirdin təhsil alması üçün nəzərdə tutulan məktəb 10 sinif otağı, 1 müəllimlər otağı, kitabxana və digər köməkçi otaqlardan ibarətdir.

Məktəb direktoru Səhrab Həşimov dedi ki, yeni təhsil ocağı zəruri avadanlıqlarla təmin olunub:

"Məktəbə cavan müəllimlər dəvət olunub. Əvvəlki məktəb o qədər də yaxşı şəraitdə olmadığı üçün müəllimləri cəlb etməkdə çətinlik çəkirdik. Sinif otaqlarını qızdırmaq olmurdu. Şagirdlər tez-tez xəstələnirdi. İndi isə modul tipli bu məktəb kombi isitmə sistemi ilə təchiz edilib. Yeni dərsliklər paylanılıb. Hələ kitabxanamız köçürülməyib, amma yaxın günlərdə o işlər də tamamlanacaq. Gördüyünüz bu məktəb 1 ay 15 gün ərzində ərsəyə gətirilib. Məktəb 82 şagird üçün nəzərdə tutulub. Şagirdlərdən 45-i 1-4-cü siniflərdə, 35-i 5-9-cu siniflərdə oxuyur. Ümumilikdə isə şagirdlərin 28-i qız, 41-i isə oğlandır. Eyni zamanda, məktəbdə dərs deyən 20 müəllimdən 5-i kişi, 15-i isə qadındır. Yaxın zamanda məktəb iki növbəli sistemə keçəcək. Onda kitabxana üçün ayrılan otağa köhnə məktəbdəki 1500 ədəd kitab və uşaqların istifadəsi üçün yenə bədii kitablar yığılacaq".

Təhsil Nazirliyinin tədris tikinti və təchizad idarəsinin müdür müavini Fərhan Əliyev qeyd etdi ki, modul tipli məktəblər gələcək üçün daha çox perspektiv vəd edir:

"Hazırda gördüyünüz modul tipli məktəb binası rütubətə davamlı xüsusi avadanlıqlarla hazırlanıb. Onlar çox rahat şəkildə açılıb yığıla bilir. Sahəsi genişləndirilə bilər. Bu tip məktəblər digər məktəblərdən seçilmir. Əksinə həm maliyyə cəhətdən, həm də vaxt cəhətdən daha tez istifadəyə verilə bilir. Kənd yerlərində şəhər məktəblərindən fərqli olaraq siniflərdə şagirdlər az olur. Bir sinifdə maksimum 10-13 nəfər şagird oxuyur. Buna görə də modul tipli məktəblər bölgələrdə, ucqar kəndlərdə daha çox əlverişli hesab olunur".

Məktəb haqqında şagird və valideynlər də müsbət fikirdə idilər. Yerli sakinlər dedilər ki, uşaqların sinif otaqları o qədər yararsız halda olub ki, soyuqda oturmaq mümkün olmayıb. İndi isə istifadəyə verilən məktəbdə isitmə sistemi var.

Uşaqlar bildirdilər ki, oturacaqlar paltarlarını bərbad günə qoyurmuş, soyuqdan sinifdə oturmaq mümkün deyilmiş. Məktəbə həvəssiz gedirlərmiş. Amma indi sevinə-sevinə gəlirlər.

Rayonun Cığatelli kəndində də modul tipli məktəb istifadəyə verilib. 56 şagird üçün nəzərdə tutulan ümumi orta məktəb 7 sinif otağı və 1 müəllimlər otağından ibarətdir.

Daha sonra media nümayəndələri Qəbələ rayonunun Aydınqışlaq kəndində əsaslı təmir olunan yeni məktəb binasının açılışında iştirak ediblər. Tədbirdə Qəbələ Rayon İcra Hakimiyyətinin başçısının müavini Ətayə Osmanova və rayon təhsil ictimaiyyətinin nümayəndələri iştirak ediblər. İcra başçısının müavini Qəbələnin inkişafından danışıb:

"İnkişaf etmiş rayonlardan biri kimi Qəbələ bu gün respublikamızın turizm mərkəzlərindən birinə çevrilib. Bu il rayonumuzun 2 kənddində - Seyidqışlaq və Çığatelli kəndlərində modul tipli məktəblər uşaqların və müəllimlərin istifadəsinə verilib. Bundan əlavə, rayonun Aydınqışlaq kəndində 1978-ci ildə inşa edilən böyük məktəb binası əsaslı təmir edilib. Bu işdə əməyi keçən hər kəsə təşəkkür edirəm".

Məktəb direktoru Sevil Nəbiyeva ölkə başçısına təhsil sahəsinə ayırdığı diqqət və qayğıya görə təşəkkür edərək jurnalistləri məktəbin təmirdən sonrakı vəziyyəti ilə tanış edib:

"1978-ci ildə tikilən məktəb binası artıq yararsız hala düşdüyü üçün əsaslı təmirə ehtiyac vardı. Nazirliyin təşəbbüsü ilə məktəb binası bu il əsaslı təmir olunub. Yüksək səviyyədə təmir edilən məktəbimiz bütün zəruri avadanlıq və dərs vəsaitləri ilə təmin olunub. Məktəbdə 24 sinif otağı, 2 laboratoriya və müəllimlər otağı istifadəyə verilib. Təhsil ocağında 364 şagirdin təlim-tərbiyəsi ilə 52 müəllim məşğul olur".

Təhsil Nazirliyinin mətbuat xidmətinin rəhbəri Cəsarət Valehov qeyd edib ki, son illərdə təhsil sahəsində qarşıya qoyulan əsas məqsədlərdən biri Azərbaycanın bütün bölgələrində məktəb binalarının yenidən qurulması və əsaslı təmiridir:

"Modul tipli məktəblərin qısa zamanda bir çox kənd məktəblərini əvəz etməsi böyük uğurdur. Azərbaycanda yaxın vaxtlarda demək olar ki, təmirsiz məktəb qalmayacaq. Aydınqışlaq kənd tam orta məktəbinin həyəti, idman meydançası da yenidən qurulacaq. Cənab nazirin adından 5 ədəd noutbuku da məktəbə hədiyyə edirik".

Daha sonra dolanbaclı yollar bizi Oğuzun Yemişanlı kəndində apardı. Ümumilikdə Oğuzda artıq 3 modul tipli məktəb istifadəyə verilib. Kənd mərkəzdən xeyli aralıda yerləşir. 80 şagirdlik məktəb binası 10 sinif otağı, kitabxana, müəllimlər otağı və 5 sanitar qovşaqdan ibarətdir.

Məktəb direktoru Muxtar Malıyev qeyd edib ki, köhnə məktəb binası 1969-cu ildə tikildiyi üçün qəzalı haldadır:

"Hazırda istifadəyə verilən modul tipli məktəb 73 şagird üçün nəzərdə tutulub. Məktəb 9 illikdir. Şagird sayı az olduğu üçün 1-3 siniflər və 2-4 cü siniflər komplektləşdirilib. Dərsin yarısı bir proqrama, yarısı da digər proqrama ayrıldığı üçün uşaqlarda diqqət pozuntusu yaranır. Siniflərdə uşaqların sayının az olması, eləcə də müəllim kollektivinin hələ tam yığılmaması buna səbəb olsa da, dərs keyfiyyətinin artırılması üçün hər sinifin ayrı-ayrı olması daha yaxşı olardı. Məktəbdə kimya, coğrafiya, biologiya, fizika, fiziki tərbiyə ixtisasları üzrə müəllimlərə ehtiyac var. Hazırda məktəbdə çalışan 18 müəllimdən 10-u qadındır".

Qeyd edək ki, Balakən, Sabirabad, Şəki, Quba, Qusar, Neftçala, Kürdəmir, Ağdaş, İsmayıllı, Tovuz, Göygöl, Tərtər, Göyçay, Qəbələ, Oğuz və digər rayonlarda inşa olunan modul tipli məktəblərlə yanaşı, cari ilin sonuna qədər 44 rayon əhatə olunmaqla, 100 azkomplektli və qəzalı vəziyyətdəki kənd məktəblərinin modul tipli məktəblərlə əvəz edilməsi də nəzərdə tutulur.

Könül Cəfərli


Xəbərin orijinal ünvanı: http://publika.az/news/bilik/214116.html

Şahid olduğunuz hadisələrin video və ya fotosunu çəkərək bizə göndərin:
0552252950 (Whatsapp)

BU KATEQORİYADAN DİGƏR XƏBƏRLƏR