Bakı. Aqşin Rafiqoğlu - APA-Economics. Ötən il Əmək və Əhalinin Sosial Müdafiəsi Nazirliyinin (ƏƏSMN) Bakı Uşaq Bərpa Mərkəzində 2 769 nəfər, Naxçıvan Uşaq Bərpa Mərkəzində isə 364 nəfər sağlamlıq imkanları məhdud 18 yaşadək uşaq stasionar və ambulator qaydada bərpa-müalicə xidməti ilə təmin edilib.
Nazirliyin İctimaiyyətlə əlaqələr şöbəsindən “APA-Economics”ə verilən məlumata görə, həmçinin 85 nəfər sağlamlıq imkanları məhdud 18 yaşadək uşağın Latviyada ixtisaslaşmış bərpa-müalicəsi təşkil olunub. Bununla da qeyd olunan dövrdə ƏƏSMN tərəfindən ümumilikdə 3 497 nəfər uşaq bərpa-müalicə xidmətinə cəlb edilib.
Bakı və Naxçıvan şəhərlərindəki uşaq bərpa mərkəzlərində stasionar şəraitdə bərpa-müalicə xidməti göstərilən ümumilikdə 1226 nəfər uşaqdan 70 nəfərində (5,7 faiz) tam yaxşılaşma, digərlərində isə nisbi yaxşılaşma qeydə alınıb. Həmin müəssisələrdə sağlamlıq imkanları məhdud uşaqlara bərpa-müalicə xidməti göstərilməklə bərabər, onların sosial reabilitasiyası, şəxsiyyətinin korreksiya olunması, əmək terapiyası məqsədi ilə kompleks işlər görülür.