Bakı. 17 oktyabr. REPORT.AZ/ AFFA İntizam Komitəsi "Neftçi" klubunun futbolçusu Derlis Meza Kollini 1 oyunluq cəzalandırıb. "Report"un məlumatına görə, buna 29 yaşlı yarımmüdafiəçinin Azərbaycan Premyer Liqasının VIII turunda "Səbail"lə səfər oyunu zamanı ikinci sarı vərəqə alması səbəb olub.
85-ci dəqiqədə meydandan kənarlaşdırılmış Meza Kolli həm də klubunu 200 manat ziyana salıb.
Qeyd edək ki, "Neftçi" Premyer Liqanın IX turunda Gəncədə "Kəpəz"lə üz-üzə gələcək. Oktyabrın 21-də keçiriləcək görüş saat 15:30-da başlanacaq.
