Tahir Gözəl: "Əminəm ki, bütün dünya bu oyunu alqışlayacaq"

Tahir Gözəl: "Əminəm ki, bütün dünya bu oyunu alqışlayacaq"
23:17 18 Oktyabr 2017
68 İdman
Ölkə mətbuatı
A- A+

Bakı. 18 oktyabr. REPORT.AZ/ "Qarabağ"ın vitse-prezidenti Tahir Gözəl Bakıda İspaniya "Atletiko"su ilə qolsuz heç-heçə etdikləri Çempionlar Liqasının qrup mərhələsinin III tur matçından sonra jurnalistlərin suallarını cavablandırıb.
"Report"un məlumatına görə, klub rəsmisi əvvəlcə oyun barədə danışıb...
- Hamımız şahidi olduq və "Qarabağ" bir daha sübut etdi ki, dünyanın, Avropanın ən nəhəng klubları ilə yaxşı mübarizə aparan, onları müdafiə olunmağa məcbur edən, güclü əks-hücumlara çıxan komandadır. Bu komanda Azərbaycanı, Qarabağı doğrudan da layiqincə təmsil etdi. Bu, xalqımızın, Azərbaycanımızın, cənab prezidentimizin gücüdür. Əminəm ki, bütün dünya bu oyunu alqışlayacaq. Belə gözəl oyun mübasibətilə klubumuzu, xalqımızı və cənab prezidentimizi təbrik edirəm. Doğrudan da buradan qürurla ayrılırıq. Kaş qələbə olaydı...Çoxlu fürsətlər oldu, amma alınmadı.
Nəticəyə görə təəssüfləndiniz?
- Əlbəttə, çox təəssüfləndim. Bir neçə epizodumuz var idi. Deməzdim ki, Dino Ndlovunun epizodunda 100 faizlik penalti var idi. Amma baş hakimə baxır. Penalti verə bilərdi, vermədi. Qırmızı vərəqəyə görə narahat oldum. "Atletiko"ya qarşı 18 dəqiqə 10 nəfərlə, son dəqiqələrdə isə 9 nəfərlə oynadıq. Mən bu gün "Qarabağ"ı mənəvi cəhətdən qalib sayıram.
Bu oyunla "Qarabağ"ın qrup 3-cüsü kimi Avropa Liqasının 1/16 finalına vəsiqə şansı qalır?
- Futbolda şans amili də var. Hesab edirəm ki, "Qarabağ"ın şansı hələ də qalır. Buradakı oyunu Madriddə də sərgiləsək, orada da ilk dəqiqələrdən pressinq etsək, buradakı özünəinamı ora da daşısaq və uğurlu nəticə göstərsək, inanıram ki, qrupdan çıxma şansımızı qoruyacağıq. Baxmayaraq ki, biz nəhəng klublarla üz-üzəyik. Amma çox çətindir. Etiraf etməliyik ki, biz ən ağır qrupa düşmüşük. Bunun adı "ölüm qrupu"dur. Amma artıq ilk xal var. Daha bir oyundan nəticə ilə ayrılsaq, hesab edirəm ki, şansımız olacaq. Bəli, bu gün biz iddialıyıq!
Ndlovu qırmızı vərəqə aldığı üçün Madriddə oynamayacaq. Onun yoxluğu hiss olunacaqmı?
- Bu, artıq texniki məsələdir və Qurban Qurbanova aiddir. Bəli, Ndlovunun yoxluğu bizim üçün itkidir. Amma vəziyyətə baxacağıq.
"Atletiko"nu digər rəqiblərlə müqayisədə "Qarabağ" üçün ən uyğun rəqib sayırsınız?
- "Atletiko" əks-hücumları ilə tanınan, tez refleks verən bir klubdur. Amma bütün rəqiblərimiz çox çətin, dünya səviyyəlidirlər. Bu yaxınlarda "Barselona" ilə heç-heçə etmiş komandaya qarşı çıxış etmişdilər. Əhval-ruhiyyədən də çox şey asılıdır. Hesab edirəm ki, "Qarabağ" bütün imkanlarını, gücünü ortaya qoymalıdır. Belə etsək, şansımız da olacaq.

Xəbərin orijinal ünvanı: https://report.az/futbol/tahir-gozel-eminem-ki-butun-dunya-bu-oyunu-alqislayacaq

Şahid olduğunuz hadisələrin video və ya fotosunu çəkərək bizə göndərin:
0552252950 (Whatsapp)

BU KATEQORİYADAN DİGƏR XƏBƏRLƏR