Oktyabrın 16-da Cenevrədə keçirilən prezidentlərin
görüşündə qurbanların olmamasına görə təmas xəttində gərginliyin
azaldılması haqda razılaşma əldə olunsa da, cəmi üç gün sonra Serj
Sarkisyan razılaşmanı pozdu. Başqa sözlə erməni hərbi
birləşmələrinin atəşkəsi pozmasına izin verdi.
Publika.az xəbər verir ki, Müdafiə Nazirliyi düşmənin
atəşkəsi 143 dəfə pozduğu haqda məlumat yayıb.
Ermənistan mediasının məlumatına görə, atəşkəsin pozulması
nəticəsində erməni hərbi birləşmələrinin 1998-ci il təvəllüdlü
əsgəri Tiqran Xaçatryan məhv edilib. Faktiki olaraq, bu, Sarkisyan
rejiminin razılaşmanı pozmasının nəticəsidir. Lakin işğalçı ölkənin
hərbi xuntası üçün bu, o qədər də əhəmiyyətli görünmür. Hesab etmək
olar ki, Sarkisyan atəşkəsi pozaraq, nəticənin belə olmasını
planlaşdırıb. Çünki bu, ona Azərbaycanı ittiham etməyə, həmçinin,
daxili auditoriyada “böyük təhlükə” görüntüsü yaradaraq, özünün
əvəzedilməzliyini sübut etməyə lazım idi.
Lakin Ermənistan ictimaiyyəti hər ölən əsgərə görə Serj Sarkisyanın
məsuliyyət daşıdığını düşünür.
Erməni siyasi şərhçi Sarqis Artsruni yazır ki, Ermənistan
hakimiyyəti müharibədən qorxur, amma sülhün də sərf etmədiyini
düşünür: “Çünki istənilən sülh variantında ərazilərin qaytarılması
öz əksini tapacaq. Ancaq cəbhədə ölən hər əsgərə görə məsuliyyəti
Ermənistan hakimiyyəti daşıyır. Biz Azərbaycan haqqında danışmırıq,
çünki Bakının əraziləri qaytarmaq üçün mübarizəyə başladığı
məlumdur”.
Erməni şərhçi əlavə edib ki, cəbhədə “yoran müharibə” gedir və bu,
Ermənistanı günü-gündən zəiflədir.
Asif