YARAT Müasir İncəsənət Məkanı “Müasir?” (“Contemporary?”) adlı rəqs performansını təqdim edəcək

14:08 6 Aprel 2015
Ölkə mətbuatı
A- A+


Bakı, 6 aprel, AZƏRTAC
YARAT Müasir İncəsənət Məkanı və Litvanın “Arts Printing House” Mərkəzi böyük məmnuniyyətlə birlikdə “Müasir?” (“Contemporary?”) adlı performansı təqdim edəcəklər. Artıq “Qızıl səhnə xaçı” ilə təltif olunmuş (2013) bu rəqs tamaşası aprelin 14-də Azərbaycan Dövlət Rus Dram Teatrında nümayiş etdiriləcək. Aprelin 15-də isə performans ifaçılarından biri olan Agnė Ramanauskaitė tərəfindən rəqs məşğələsi də keçiriləcək.
YARAT Müasir İncəsənət Məkanından AZƏRTAC-a bildirilib ki, ilk tamaşası “Arts Printing House” Mərkəzində 2013-cü ildə baş tutmuş bu 60 dəqiqəlik əsər Litvanın müasir rəqs mənzərəsini hədəfə alaraq, rəqs, xoreoqrafiya və səhnələşdirmə prosesinin daxilindən həmin mövzuya nəzər salır. Yumor və fiziki hərəkətlər vasitəsilə “Contemporary?” performansı tamaşaçılar qarşısında “bu günün müasir rəqsi nədir?”, “onun səhnələşdirməsi necə olmalıdır?”, bir də özünə qarşı istehza ilə səslənərək “rəqsi anlamaq tamaşaçının nəyinə lazımdır?” kimi suallar qoyur.
Əsər üzərində düşünərək ona quruluş verib ifa edənlər 16 il ərzində 30-dan artıq səhnə obrazı yaratmış adlı-sanlı Litva rəqqası və xoreoqrafı Mantas Stabačinskas, litvalı rəqqasə, aktrisa və pedaqoq, Litva Teatr və Musiqi Akademiyasının məzunu Agnė Ramanauskaitė və litvalı rəqqas, aktyor, 2010-cu ilin “Ən yaxşı gənc aktyor” teatr mükafatının nominantı Paulius Tamolédir. “Contemporary?” performansı artıq beynəlxalq miqyasda da təqdim olunub, o cümlədən Almaniya və Estoniya kimi ölkələrdə nümayiş etdirilib.
Agnė Ramanauskaitėnin aprelin 15-də keçəcəyi rəqs məşğələsi tələbələrin təbii və ixtiyarsız hərəkət hissini gücləndirməli, “rəqs lüğəti”ni zənginləşdirmək üçün onlara müasir rəqs texnikalarını öyrətməlidir.
Aprelin 14-də təqdim olunacaq performans üçün biletləri Rus Dram Teatrından əldə etmək olar. Aprelin 15-də keçiriləcək rəqs məşğələsi isə peşəkar rəqqaslar və aktyorlar üçün nəzərdə tutulub. İştirak barədə məlumat info@yarat.az ünvanına göndərilməklə öncədən təsdiqlənməlidir.
YARAT Müasir İncəsənət Məkanı Azərbaycanın paytaxtı Bakıda yerləşən qeyri-kommersiya təşkilatı olub Aida Mahmudova və bir qrup rəssam tərəfindən 2011-ci ildə təsis edilib. Təşkilat Azərbaycanda müasir incəsənətin dəstəklənməsi və geniş ictimaiyyət tərəfindən dərk olunması məqsədi ilə fəaliyyət göstərir, onun ölkə daxilində və beynəlxalq aləmdə təbliği ilə məşğuldur.
YARAT tərəfindən indiyədək əksəriyyəti Bakıda təşkil olunmuş 120-dən artıq layihə həyata keçirilib. YARAT-ın fəaliyyətində əsas mahiyyət kəsb edən tədris-təlim işi art-rezident səfərlərindən, müsabiqələrdən, mühazirə və praktiki məşğələlərdən ibarətdir. 2012-ci ildə YARAT tərəfindən YAY Qalereyası təsis edilib. Bu ictimai əsaslı müəssisədə əsərlərin satışından əldə edilən qazanc müəlliflə YARAT arasında bölüşdürülür. YARAT, həmçinin Bakıda açıq havada düzənlənən iki Pablik-Art Festivalı keçirib, şəhərin muzeyləri ilə birlikdə sərgilər hazırlayıb. 2014-cü ildə yay məktəbi təşkil olunub, eləcə də yeni bir binası istifadəyə verilib. Həmin binada rəssam emalatxanaları və “art-rezident” proqramı üçün mənzillər yerləşir. Təşkilatın ARTIM proqramı incəsənətə meyl göstərən gəncləri dəstəkləyir, onların işlərini kuratorların diqqətinə çəkib sərgiləməyə imkan yaradır.
2015-ci ilin martında YARAT Müasir İncəsənət Mərkəzi də açılıb. Bu mərkəz YARAT-ın ilk daimi sərgiləmə yeridir. Üzü Xəzər dənizinə açılan və sovet dönəmində hərbi donanma qərargahı olmuş bu yeni mərkəz (sahəsi 2000 m2) müasir incəsənətə və onun tədrisinə xidmət edən regional miqyaslı qovşaqdır. Burada müvəqqəti sərgilərlə yanaşı, YARAT-a məxsus daimi kolleksiyanın əsərləri də nümayiş etdirilir. Daimi kolleksiya Qafqaz, Orta Asiya və qonşu ölkələri təmsil edən görkəmli sənətkarların, eləcə də Azərbaycan ilə səsləşən əsərlər yaratmış dünya şöhrətli rəssamların işlərindən ibarətdir.
YARAT-ın beynəlxalq layihələrindən isə 55-ci Venesiya Biennalesinin müstəqil tədbirlər proqramında iştirakı qeyd etmək lazımdır. Bu il YARAT 56-cı Venesiya Biennalesinin müstəqil tədbirlər proqramında iştirak edəcək.

Xəbərin orijinal ünvanı: http://azertag.az/xeber/YARAT_Muasir_Incesenet_Mekani_Muasir_Contemporary_adli_reqs_performansini_teqdim_edecek-843863

Şahid olduğunuz hadisələrin video və ya fotosunu çəkərək bizə göndərin:
0552252950 (Whatsapp)
loading...

RƏYLƏR

BU KATEQORİYADAN DİGƏR XƏBƏRLƏR