Diplomatlar və varlılar niyə bu ölkəni seçirlər?

Diplomatlar və varlılar niyə bu ölkəni seçirlər?
11:05 7 Aprel 2015
78 Dünya
Ölkə mətbuatı
A- A+

Siyasətçilərin, diplomatların və varlıların bu ölkəni seçməsinin ilginc səbəbləri var...
Aprelin 2-də uzun sürən gərgin danışıqlardan sonra nəhayət İran və “altılıq” (BMT TŞ-nin 5 daimi üzvü + Almaniya) ölkələri arasında razılaşma əldə olundu.

Bundan sonra İsveçrənin Lozanna Universitetində İran xarici işlər naziri Məhəmməd Cavad Zərif və Avropa Birliyinin xarici siyasət məsələləri üzrə koordinatoru Federika Moqerini birgə mətbuat konfransı keçirdilər.

Lozanna Universitetinin salonunda 1923-cü il iyulun 24-də Türkiyə Böyük Millət Məclisi ilə İngiltərə, Fransa, İtaliya, Yaponiya, Yunanıstan, Rumıniya, Bolqarıstan, Portuqaliya, Belçika, SSRİ və Yuqoslaviya nümayəndələri arasında Lozanna müqaviləsi imzalanıb. Beləcə, İsveçrə bir çox beynəlxalq və dövlətlərarası sazişə ev sahibliyi edib. Cenevrə Konvensiyası, Sürix protokolları kimi xeyli populyar olan sənədlər, diplomatik danışıqlar məhz bu ölkədə baş tutub. Bunun isə xüsusi səbəbi var.

Avropanın mərkəzində yerləşən, gözəl təbiətə malik İsveçrə dünyada bankların, bahalı saat markalarının vətəni hesab olunur. İsveçrənin ən mühüm özəlliyi isə heç şübhəsiz ki, tərəfsiz dövlət olmasıdır. Ölkənin tərəfsizliyi ilə bağlı ilk beynəlxalq siyasi hadisə 1815-ci ildə Vyana konqresində qəbul olunan sənəd idi. Bununla da Avropa dövlətləri İsveçrənin müstəqil və tərəfsiz ölkə olmasını qəbul etdilər, buna beynəlxalq təminat verdilər.

1863-cü ildə isə İsveçrədə dünyada tərəfsiz yardım qurumu olan Qızıl Xaç təşkilatı yaradılır. Hazırda bu ölkənin bayrağı Qızıl Xaçın bayrağıdır. İsveçrə Avropa Birliyinin üzvü deyil, BMT-yə isə yalnız 2002-ci ildə üzv olub. 2006-cı ildən bu yana BMT İnsan Haqları Şurası da İsveçrədə yerləşir. Yeri gəlmişkən, BMT-nin Nyu-Yorkdan sonra ikinci əsas ofisi İsveçrənin Cenevrə şəhərində yerləşir. Bundan başqa, BMT Qaçqınlar Təşkilatı (UNHCR) və daha bir çox ofisləri İsveçrədə yerləşir. Həmçinin Ümumdünya Səhiyyə Təşkilatı, Beynəlxalq Əmək Təşkilatı, Beynəlxalq Telekommunikasiya İttifaqı, Ümumdünya Ticarət Təşkilatı da daxil olmaqla 200-ə qədər beynəlxalq qurumun ofisi İsveçrə ərazisindədir.

Hər il yanvar ayında İsveçrənin Davos qəsəbəsində dünya liderlərinin iştirakı ilə beynəlxalq iqtisadi forum keçirilir. Burada Beynəlxalq Basketbol Federasiyası, Avropa Futbol Federasiyaları Assosiasiyası (UEFA), Beynəlxalq Futbol Federasiyası Assosiasiyası (FİFA), Beynəlxalq Buzüstü Hokkey Federasiyası, Beynəlxalq Motosikletçilər Birliyi, Beynəlxalq Olimpiya Komitəsi və 385 bank fəaliyyət göstərir.

Bir qədər əvvəl dünyanın 203 ölkəsindən olan 106,000 müştərinin 100 milyard dollarlıq sərvəti haqda məlumatlar mediaya sızdırılmışdı. Gizli məlumatların gün işığına çıxması ilə HSBC bankının fırıldaqçılara, terrorçular və quldurlara yardım etdiyi və ümumi dəyəri 120 milyard dollarla ölçülən çirkli pulların yuyulması əməliyyatı həyata keçirdiyi ortaya çıxıb. Bankın vergi və qaçaqmalçılıq işlərinə yardım etdiyi şəxslər arasında dünya miqyasında tanınan cinayətkarlar, korrupsiyada ittiham olunan siyasətçilər və iş adamları, eyni zamanda dünya siyasətçiləri, aktrisalar, idmançılar da yer alır.

Ancaq bütün bunlara baxmayaraq, İsveçrə dünyanın ən zəngin adamları və siyasətçiləri üçün ən cəlbedici ölkə olaraq qalır. Bir səbəb deyildi - beynəlxalq təminat. İkinci əsas təminatı isə onun keçilməz coğrafiyasıdır. Əsasən yüksək sıldırımlı dağlardan ibarət olan təbii “səngərlərə” sahib İsveçrənin kənardan müdaxilə ilə işğal olunması xeyli dərəcədə çətindir.

İsveçrənin təhlükəsiz ölkə olmasının daha bir səbəbi isə əhalisinin həddən artıq silahlı olması ilə bağlıdır. 8 milyon əhalisi olan ölkənin hərbi qüvvələri ilə yanaşı vətəndaşlarının demək olar ki, böyük çoxluğu silahlıdır, hətta bəzi məlumatlara görə, İsveçrədə az qala hər evdə silah mövcuddur.

Bundan başqa, İsveçrə qanunları bank hesablarının gizliliyinə təminat verir. Yerli qanunlara görə, heç bir bank hesabı sahibinin razılığı olmadan açıqlana bilməz. Bank təhlükəsizliyi ilə bağlı məlumatsız insanlara belə banklar xüsusi məsləhətçi xidmətləri verir.

Bütün bu beynəlxalq və yerli qanunlar dünya varlıları üçün İsveçrəni cəlbedici edir. Dünyanın bir çox ölkələrinin siyasi xadimlərinin məhz İsveçrə banklarında gizli hesablarının olmasının səbəbi bu amillə bağlıdır. Digər tərəfdən, gözəl təbiəti, turizm imkanları planetin hər nöqtəsindən imkanlı insanları, siyasətçiləri bu ölkəyə cəlb edir. Nəticədə dünyanın əksər nüfuzlu qurumları, təhsil ocaqları, idman, maliyyə, siyasi və sair təşkilatlar özlərinə mərkəzi ofis olaraq İsveçrəni seçirlər.

"Yeni Müsavat"


Xəbərin orijinal ünvanı: http://news.milli.az/world/333209.html

Şahid olduğunuz hadisələrin video və ya fotosunu çəkərək bizə göndərin:
0552252950 (Whatsapp)
loading...

RƏYLƏR

BU KATEQORİYADAN DİGƏR XƏBƏRLƏR