Bakı, 7 aprel, AZƏRTAC
Dünya Güləş Birliyi (DGB) 2015-ci il martında keçirilən yarışların nəticəsinə əsasən, yunan-Roma güləşi üzrə yeni reytinq siyasını açıqlayıb. Yunan-Roma güləşi üzrə reytinq siyahısında 8 Azərbaycan güləşçisi yer alıb.
AZƏRTAC xəbər verir ki, Rəsul Çunayev (71 kq) və Rafiq Hüseynov (80 kq) ötən ay olduğu kimi birinciliklərini qoruyublar. Həsən Əliyev (66 kq), Saman Təhmasibi (85 kq) və Elvin Mürsəliyevin (75 kq) də mövqeyində dəyişiklik baş verməyib. Saman Təhmasibi 2-ci, Həsən və Elvin müvafiq olaraq siyahıda 5-ci yerdədir.
Ötən ay keçirilən U-23 Avropa çempionatında bürünc medal qazanan İslam Abbasov (85 kq) 2 pillə irəliləyərək 6-cı sıraya yüksəlib.
Digər güləşçilərimizdən Taleh Məmmədov (59 kq) 14-cü və Kamran Məmmədov (66 kq) 17-ci pillədə qərarlaşıblar.
