Bakı. Könül Kamilqızı – APA. Ötən sutka ərzində havanın qarlı keçməsi ilə əlaqədar təcili tibbi yardım stansiyasına 13 müraciət daxil olub.
Bakı Şəhər Təcili və Təxirəsalınmaz Tibbi Yardım Stansiyasının operativ işlər üzrə şöbəsinin böyük həkimi Zemfira Vahidova APA-ya açıqlamasında deyib ki, müraciət edənlər küçədə yıxılma nəticəsində müxtəlif zədələr alıblar.
Z. Vahidova qeyd edib ki, 3 nəfərə yerində yardım göstərilib, 10 nəfər xəstəxanaya yerləşdirilib: “Xəsarət alanlardan 9-u qadın, 4-ü kişidir. 10 nəfərdən 6 nəfər Travmatologiya ve Ortopediya Elmi-Tədqiqat İnstitutuna, 2 nəfər Klinik Tibbi Mərkəzə, 1 nəfər Sabunçu Xəstəxanasına, 1 nəfər isə Respublika Neyrocərrahiyyə Xəstəxanasına yerləşdirilib. Xəstəxanaya yerləşdirilənlərdən 3 nəfərinin vəziyyəti ağır olub, onlar kəllə-beyin travması alıb. Onlardan biri 10 yaşlı uşaqdır. O, Respublika Neyrocərrahiyyə Xəstəxanasına yerləşdirilib”.