“Nvidia” videokart istehsalçısı “AnyVision” şirkəti ilə birlikdə “ağıllı” videomüşahidə sistemi üzərində işə başlayıb. Mühəndislərin planına görə, kameralar daim insanların sifətini skan edərək qanun pozucularını izləyəcəklər.
“ICTnews” Elektron Xəbər Xidməti “Life” resursuna istinadən yazır ki, sistem videonu yazmaqla yanaşı, təsviri analiz edən yüzlərlə şəhər kamerasının mövcudluğunu nəzərdə tutan “Nvidia Metropolis” layihəsi çərçivəsində hazırlanır. Alqoritmlər hüquq-mühafizə orqanlarının məlumat bazasına əsaslanaraq insan axınında cinayətkarı 99 faiz dəqiqliklə müəyyənləşdirməyə imkan verir. Həmçinin sistem itkin düşmüş insanları tapa bilir.
Müşahidəçilər qeyd edir ki, texnologiya həm minlərlə insan həyatını xilas edə, həm də vətəndaşların məxfiliyinə xələl gətirə bilər. “Nvidia” nümayəndələrinin sözlərinə görə, hazırlanan sistemin tam qapalı olması səbəbindən kameralar tərəfindən qeydə alınan bütün informasiya üçüncü şəxslərdən mühafizə olunur.
Nizam Nuriyev
