Meksikanın Xalisko ştatında yanvarın 31-dən itkin düşmüş İtaliyanın 3 vətəndaşının polis əməkdaşları tərəfindən oğurlanaraq cinayətkar qrupun üzvlərinə təhvil verildiyi müəyyən edilib.
APA-nın xəbərinə görə, bu barədə ştat prokurorluğunun məlumatında bildirilir. İtkin düşənlərin hamısı İtaliyanın Neapol şəhərinin sakinləridir. Onlar itkin düşməzdən əvvəl qohumlarına polislər tərəfindən saxlanıldıqlarını bildiriblər. Bundan sonra onlarla əlaqə kəsilib.
Məlumata görə, hadisə ilə əlaqəli polis əməkdaşları artıq müəyyən edilərək saxlanılıblar. Onlar törətdikləri əməli etiraf ediblər. Yerli qanunvericiliyə əsasən, onları 40-60 il həbs cəzası gözləyir.
Hazırda əcnəbilərin axtarışı davam etdirilir.
