"Real" cari mövsümdəki qollarının sayını 100-ə çatdırıb. Apasport.az saytının xarici mətbuata istinadən məlumatına görə, "kral klubu" buna La Liqanın XXV turunda "Alaves"lə qarşılaşmada nail olub.
Kriştianu Ronaldonun 2, Kərim Benzema və Qaret Beylin isə hərəyə 1 dəfə fərqləndiyi qarşılaşmada madridlilər bu mövsüm bütün turnirlərdə qollarının sayını 103-ə yüksəldib. Zinəddin Zidanın yetirmələri La Liqada 62, İspaniya Kral Kubokunda 11, İspaniya Superkubokunda 5, Çempionlar Liqasında 20, Avropa Superkubokunda 2, Qitələrarası Dünya Çempionatında isə 3 qola imza atıb.
Bununla "Real" bu mövsüm 100 qol səddini keçən ilk İspaniya komandası olub. Onun ən yaxın izləyicisi olan "Barselona"nın isə aktivində 92 top var.
