Vaşinqtonda Xocalı qətliamının ildönümünə həsr olunmuş anım konserti keçirilib

ABŞ-ın paytaxtı Vaşinqton şəhərində Xocalı qətliamının 26-cı ildönümünə həsr olunmuş anım konserti keçirilib.

Azərbaycanın ABŞ-dakı səfirliyindən Metbuat.az-a verilən məlumata görə, səfirliyin dəstəyi ilə Vaşinqton Beynəlxalq Piano İncəsənət Şurası tərəfindən təşkil edilən bu tədbir Azərbaycanın tolerantlıq ənənələrinə sadiqliyinin göstəricisi kimi Vaşinqtonun tanınmış və tarixi ibadət məkanlarından biri olan “Western Presbyterian” kilsəsində keçirilib. Tədbirdə iştirak edən çoxsaylı qonaqlar sırasında Vaşinqtonda akkreditə olunan diplomatik korpus, yerli ictimaiyyət nümayəndələri, mədəniyyət xadimləri, tələbələr, həmçinin Vaşinqton və onun ətrafında yaşayan soydaşlarımız olub.

Tədbirdə açılış edən Amerika Beynəlxalq Diplomatik Xidmət Əməkdaşları Assosiasiyasının (AAFSW) proqram rəhbəri Şila Svitzer “Sülh laylası” layihəsi barədə məlumat verib və onun dərin emosional təsirlərindən söz açıb. Xocalı soyqırımı qurbanlarının xatirəsinə həsr olunmuş “Sülh laylası” konserti Azərbaycan şairi Yusif Savalanın müəllifi olduğu “Xocalı uşaqlarına layla” adlı şeir əsasında amerikalı pianoçu və bəstəkar Haskell Smol, sopranoçu Culian Beird, klarnetçi Şeril Hill və hekayətçi İrvinq Benavides tərəfindən hazırlanan musiqili əsərin təqdimatına həsr edilib.

Daha sonra Azərbaycanın ABŞ-dakı səfiri Elin Süleymanov çıxış edərək iştirakçılara Ermənistanın Azərbaycana təcavüzünün acı xatirələrindən biri kimi Xocalı qətliamı barədə məlumat verib və münaqişənin yalnız iki dövlət arasında deyil, həmçinin əhali səviyyəsində dərin izlər buraxdığını qeyd edib. Səfir bu xüsusda tədbirin xüsusi qonağı kimi Xocalı hadisələrinin canlı şahidi, Azərbaycan Dillər Universitetinin müəllimi Yusif Savalanı təqdim edib və onun İkinci Dünya Müharibəsində 33 yaşında nasistlərin ölüm düşərgəsində sağ qalan atası Savalanın 50 il sonra 83 yaşında məhz Xocalıda qətlə yetirilməsi faktını misal gətirərək bu faciənin dünya ictimaiyyəti üçün nə qədər simvolik məna kəsb etdiyinə diqqət yönəldib.

Səfir əlavə edib ki, Azərbaycan ərazilərinin işğalı faktı və onun əhalisinə qarşı törədilən Xocalı soyqırımının Azərbaycanın müstəqilliyinin bərpasının dərhal ardınca baş verməsi onu göstərir ki, bu əməllər xüsusi məqsədlə törədilmiş və məhz xalqımızın müstəqillik ruhunu boğmağa hədəflənmişdi. E.Süleymanov Azərbaycan dövləti və xalqının tarix boyu qonşu dövlətlərlə dinc yanaşı yaşadığını önə çəkərək Azərbaycan tərəfinin erməni xalqına deyil, məhz onun işğalçı və təcavüzkar siyasət yürüdən siyasi rəhbərliyinə qarşı olduğunu vurğulayıb və gələcəkdə ölkəmizin Dağlıq Qarabağ bölgəsində hər iki icmanın sülh şəraitində birgə yaşayacağına ümidvar olduğunu bildirib.

Daha sonra konsert proqramı çərçivəsində tanınmış bəstəkarların musiqi parçaları, o cümlədən “Gecə himni” (Herni Pörsel), “Sakit ibadət” (Haskell Smol), “Für Alina” (Arvo Pərt), “Müqəddəs gecənin himni” (Corc Kramb), “Aprel ayı” (Fərnsis Polənk) kimi əsərlər səsləndirilib.

“Sülh laylası” şerinin müəllifi Yusif Savalan Xocalı hadisələri barədə öz xatirələrini bölüşüb və yazdığı şeri ana dilində səsləndirib. Yusif Savalan Azərbaycan əhalisinin qisas deyil, ədalət, müharibə deyil, birgə yaşayış tələb etdiyini vurğulayıb və bütün yaşadıqlarına rəğmən sülhə və öz doğma yurdunda yaşamaq ümidini itirmədiyini söylədi.

Tədbir çərçivəsində həmçinin Xocalı soyqırımına həsr olunmuş sərgi guşəsi də təşkil edilib və guşədə iştirakçılara azərbaycanlı uşaqların çəkdikləri rəsm əsərləri nümayiş olunub. Tədbirin keçirilməsində həmçinin Vaşinqton Beynəlxalq Piano İncəsənət Şurasının ölkəmiz üzrə tərəfdaşları Azərbaycan Dillər Universiteti və “Sönməz Məşəl” Mədəni Əlaqələr İctimai Birliyi iştirak edib.


Şahid olduğunuz hadisələrin video və ya fotosunu çəkərək bizə göndərin:
0552252950 (Whatsapp)
Загрузка...

RƏYLƏR

BU KATEQORİYADAN DİGƏR XƏBƏRLƏR