Teleaparıcı Alidə Mustafayevanın Milli.Az-a müsahibəsi.
- Alidə xanım, KİV-də sizin barənizdə xəbərlərə, müsahibələrə az-az rast gəlinir. Bu nə ilə əlaqədardır?
- Diqqət mərkəzində qalmağı bir o qədər də sevmirəm. Başım işimə qarışıq olur. Bir az da dediyim sözlərin təhrif olunub yazılmağından ehtiyat edirəm.
- Son bir neçə il ərzində işinizdə hansı irəliləyiş var?
- Məlum məsələdir ki, illər ötdükcə insan işində daha da təcrübə toplayır və peşəkarlaşır. Mən də həmçinin. Hələ ki, ilk iş yerim olan ATV telekanalında və “Xəbərlər” departamentindəyəm. Sonrasını Allah bilir.
- Yəni ki, başqa bir telekanala keçidiniz, yaxud fərqli ampluada veriliş aparmağınız gözləniləndirmi?
- Xeyr, mənimki xəbərdir. Mən özümü bu sahədə tapmışam. ATV də mənim işləmək üçün arzuladığım telekanal olub. Bilmirəm nədəndir, həmişə deyirdim ki, xəbərləri aparacam, özü də məhz ATV-də. İndi də şükürlər olsun ki, istədiyim yerdəyəm və özümü bu sahədə inkişaf etdirməyə can atıram.
- Bəs şəxsi həyatınızda hansı yeniliklər var? Nişan, filan...
- Hələ ki, heç nə yoxdur. İnşallah, olanda hamınız biləcəksiniz.
- Sevdiyiniz insan da yoxdur?
- O da yoxdur (gülür).
- Qapınızda toy sədaları yaxın neçə il ərzində eşidiləcək təxminən?
- Bu barədə heç nə deyə bilmərəm. Qismət olanda o da olacaq.
- Özünüzü kifayət qədər yaxşı tanıyırsınız?
- Lazım olandan da artıq tanıyıram.
- Kimsiniz?
- Alidə Mustafayeva (gülür).
- O Alidə ki, elə bil, bir az qapalı, bir az da kaprizləri olan xanımdır. Buna haradasa belədir demək olar?
- Tam kaprizli biri deyiləm. Amma özümə görə kaprizlərim var. Qapalılığımsa daxilimdən gəlir.
- Ciddiliyiniz onsuz da efirdə özünü büruzə verir. Bizə efirdənkənar Alidədən danışsanız, pis olmaz.
- Efirdən kənarda efirdəki qədər ciddi olmuram. Deyib-gülməyi, zarafatı xoşlayan biriyəm. Amma yerində...
- Oğlan dostunuz var?
- Sırf oğlan dostum var desəm, düzgün olmaz. İş yoldaşlarımla hər gün eyni şəraitdə, iş prosesində ünsiyyətdə oluram. Onların bəzilərini özümə dost bilirəm.
- Heç olubmu ki, sizinlə dostluq edən biri sonradan sizə eşq elan etsin?
- Belə bir hal olmayıb. Çünki mən qabaqcadan insanların fikirlərini hiss edə bilirəm. Qoyduğum sərhədi keçmək istəyənləri özümdən dərhal uzaqlaşdırıram.
- Siz nəinki sonradan uzaqlaşdırmaq, heç deyəsən, insanları əvvəldən yaxına buraxmırsınız axı...
- Düzdür, bu barədə bir az ehtiyatlı davranıram. Ünsiyyət qurmağımda bir problem yoxdur. Amma hər insanı da çevrəmə buraxmıram.
- Sosial şəbəkələrdən istifadə etmək baxımından siz də “xəstələnənlərdənsiniz”?
- Deməzdim. O qədər də yox. Əvvəllər, məncə, sosial şəbəkələrdə daha fəal idim. İndi isə vaxt tapanda istifadə edirəm.
- “Blok”a saldıqlarınız çoxdur?
- Kifayət qədər (gülür).
- Qısa ətəklərdən istifadə edirsiniz?
- Çox qısa yox, normal şəkildə istifadə edirəm. O da ki toydan-toya, tədbirdən-tədbirə.
- Tədbir demişkən, toy və ya şou-proqram aparırsınız?
- Dövlət tədbirlərinə dəvət alanda dəyərləndirirəm. Toy, şou-proqram mənlik deyil.
- Buna da özəl bir səbəb var?
- Səbəb budur ki, mən xəbər aparıcısıyamsa, xəbər “sima”sına hər tədbiri yaraşdırmıram. Xəbər kifayət qədər ciddilik tələb edən bir sahədir.
Cavidan Abdullayev
Milli.Az
