Milli.Az CTV-yə (Region tv-yə) istinadən bildirir ki, Cəlilabad rayonunda canavar tövləyə soxularaq 15-ə yaxın qoyunu parçalayıb. Nəticədə kredit götürərək təsərrüfat quran vətəndaşa 2 min manata yaxın ziyan dəyib. Hadisə ötən gecə rayonun Kazımabad kəndində baş verib. Kənd sakini Famil Mustafayev səhər saatlarında heyvanları yemləmək məqsədi ilə tövləyə girdikdə gördüklərinə inanmayıb.
Canavar tikilinin divarını oyaraq oradan içəri soxulub. Bunu divarın taxtalarındakı yırtıcının diş izlərindən də müşahidə eləmək olur. Tövlədəki 15 xırdabuynuzludan 13-ü yerindəcə tələf olub, 2-si isə ölümcül haldadır. Heyvanların bir neçəsinin cəsədi sonradan yaxınlıqdakı meşədə aşkar edilib. Kəndlilərin fikrincə, eyni vaxtda sürüyə bir yox, bir neçə canavar soxulub. Çünki iribuynuzlu heyvanların saxlandığı tövlənin divarları da eyni vaxtda oyulsa da canavarlar oradan içəri soxula bilməyiblər. Ümumilikdə heyvanların tələf olması ilə təsərrüfat sahibinə 2000 manata yaxın ziyan dəyib.
Canavarlarda quduzluq xəstəliyinin ola biləcəyi ehtiyat edilərək Cəlilabad Baytarlıq İdarəsi tərəfindən ərazidə dezinfeksiya işləri aparılıb. Tələf olmuş heyvanların cəsədləri xüsusi qaydada zərərsizləşdirilərək basdırılıb.
Milli.Az
