Bakı, 16 dekabr, AZƏRTAC
Məktəblilərin sağlamlığının mühafizəsi və onları zərərli vərdişlərdən çəkindirmək məqsədilə Səhiyyə Nazirliyinin İctimai Səhiyyə və İslahatlar Mərkəzi (İSİM) maarifləndirici tədbirləri davam etdirilir.
Nazirliyin mətbuat xidmətindən AZƏRTAC-a verilən məlumata görə, bununla əlaqədar Təhsil Nazirliyinin “Sağlam təhsil – sağlam millət” proqramı çərçivəsində 2 nömrəli Bakı Baza Tibb Kollecinin nəzdində orta məktəblərdə çalışan tibb bacıları üçün nümunəvi tematik təkmilləşdirmə kursu təşkil edilib. 2015-2016-cı tədris ilində pilot olaraq keçirilməsi nəzərdə tutulan həmin tematik kurslara dekabr ayında start verilib. Məqsəd orta məktəblərdə işləyən tibb bacılarının bilik və bacarıqlarının artırılmasıdır.
