Azərbaycanda ilk dəfə danışma və eşitmə qüsuru olan uşaqlara surdotərcümə ilə animasiya filmi nümayiş olunub
Hər zaman yeniliklərə açıq olan Nizami Kino Mərkəzi dekabrın 21-də MEGOGO onlayn-kinoteatrı ilə birgə sağlamlıq imkanları məhdud olan uşaqlar üçün 3№-li İnternat Evinin danışma və eşitmə qüsuru olan sakinlərinə surdotərcümə ilə "Oz: uçan meymunların basqını" animasiya filmini təqdim edib.
Böyük maraqla filmi izləyən səksəndən artıq uşaq nümayişdən sonra Nizami Kino Mərkəzi tərəfindən kinomərkəzin "Nizami Restaurant & Lounge" restoranında nahara dəvət olunub.
Balaca qonaqlar adından internatın müəllimləri uşaqlar üçün hazırlanmış tədbirə görə bütün zəhməti olan insanlara təşəkkürlərini bildiriblər.
Nizami Kino Mərkəzinin rəhbərliyi bu xeyirxah təşəbbüsdə MEGOGO onlayn-kinoteatra daima dəstəyə hazır olduğunu qeyd edib və qarşılıqlı olaraq MEGOGO-onlayn-kinoteatrın Azərbaycandakı nümayəndəliyinin rəhbəri Fərid Xəlilov Nizami Kino Mərkəzi ilə əməkdaşlığın davamlı olacağını arzu edib.
Fərid Xəlilov nəqliyyati dəstəyə görə "Atilla Trans Services A" LLC-yə də təşəkkürünü bildirib.
Xatırladaq ki, ilk leqal videoplatforma olan MEGOGO-onlayn-kinoteatrı "Bax necə eşidirsən" layihəsi daxilində surdotərcümə studiyası yaradıb və danışma və eşitmə qüsuru olan insanlar ücün filmlərin surdotərcüməsini və bu filmlərin xüsusi kataloqunu hazırlayır. MEGOGO onlayn-kinoteatrın əməkdaşları "Bax necə eşidirsən" layihəsi daxilində respublikanın bölgələrində də bu aksiyanın keçirilməsini planlaşdırır.