Bakı, 24 dekabr, AZƏRTAC
Azərbaycan Universitetində təhsil alan tələbələr üçün “Baku Business Factory” (BBF) şirkəti tərəfindən “Tələbə ikən necə biznes qurdum” mövzusunda seminar təşkil olunub.
Universitetdən AZƏRTAC-a bildiriblər ki, seminarda BBF-nin nümayəndəsi Toğrul Səmədov iştirakçılara ideyaların formalaşması və daha sonra biznesə çevrilməsinin mümkün yolları haqqında məlumat verib.
T.Səmədov əvvəlcə BBF-nin fəaliyyəti barədə məlumat verib. Qeyd edib ki, müxtəlif sahələrə aid biznes ideyaları olan gənclər BBF-dən maddi dəstək ala və müxtəlif təlimlərdə iştirak edə bilərlər.
Öz təcrübəsini gənclərlə bölüşən T.Səmədov bildirib ki, tələbəlik illəri ideyaların biznesə çevrilməsi üçün ən səmərəli dövrlərdəndir, iştirakçılar bundan maksimum faydalanmalıdırlar.