Naxçıvan, 25 dekabr, AZƏRTAC
Naxçıvan şəhərindəki Gənclər Mərkəzində muxtar respublikanın Mədəniyyət və Turizm Nazirliyinin təşkilatçılığı ilə “Lira” musiqili-intellektual oyunu təşkil olunub.
AZƏRTAC xəbər verir ki, oyunda Bəhruz Kəngərli adına Şərur şəhər incəsənət, Culfa şəhər, Babək və Şahbuz rayon uşaq musiqi məktəblərinin şagirdləri iştirak ediblər. Musiqili-intellektual oyunun məqsədi şagirdlərin musiqi haqqında dünyagörüşünü genişləndirmək, xalqımızın görkəmli bəstəkarlarının həyat və yaradıcılığını təbliğ etmək, zəngin musiqi irsimiz haqqında təsəvvürlərini genişləndirmək idi.
Əvvəlcə iştirakçılara oyunun şərtləri haqqında məlumat verib. Bildirilib ki, oyun hər biri 5 nəfərdən ibarət olan 4 komanda arasında keçiriləcək və 3 turdan ibarət olacaq. Hər bir turda komandalara musiqi ilə bağlı suallar veriləcək.
Oyun başlandıqdan sonra iştirakçılara böyük Azərbaycan bəstəkarları Üzeyir Hacıbəyli, Fikrət Əmirov, Qara Qarayev, Asəf Zeynallı, Niyazi haqqında musiqi əsərlərini dinləmə yolu ilə təyinetmə formatında, ümumi musiqi dünyagörüşü haqqında suallar verilib.
Sonda birinci yerə layiq görülən Babək rayon Uşaq Musiqi Məktəbinin “Harmoniya” komandasına diplom təqdim edilib.
