Elnarə Abdullayevanın möhtəşəm konsertindən hələ çox danışılacaq - FOTO

20-21 fevral tarixlərində Heydər Əliyev Sarayında "Zəfər çalacağıq" adlı uğurlu konsertlə çıxış edən sevilən xanəndə Elnarə Abdullayeva indi özünü ən xoşbəxt sənətçi hiss edir. Səbəb barəsində o, özü oxucularımızı məlumatlandırdı: "Özümə bəxtəvər deməyim nə deyim? Əzəmətli sarayın səhnəsinə çıxmamışdan öncə ilk xeyir-duanı canlı əfsanəmiz, SSRİ-nin xalq artisti, dünyanın Zeynəbi Zəynəb xanım Xanlarovadan aldım. Sürpriz görüşümüzdə dahi sənətkarımız məni elə sözlərlə ruhlandırdı ki, bu xoşbəxtliyi ifadə etməkdə çətinlik çəkirəm.
Zeynəb xanımın bu diqqəti məni dünyanın xoşbəxti etdi. Allah-Təala onu həmişə var eləsin. Sənətimə verdiyi yüksək qiymət ömrümün sonuna qədər mənim üçün stimul mənbəyi olacaq. Bəxtəvərəm və bunu məmnunluqla hamınızla bölüşürəm".

Azərbaycanın böyük sənətkarı Zeynəb Xanlarova müğənniyə dəstəyini və sevgisini bildirmək üçün düz konsertin keçiriləcəyi məkana gəlib. Zeynəb Xanlarovanın gəlişi ifaçıya da, onun prodüseri Asif Kərimova da böyük ruh yüksəkliyi verib. Böyük sənətkarın Elnarə Abdullayevanı bəyənməsi, həm ifaçı olaraq, həm də insan kimi qiymətləndirməsi onu xoşbəxt edib. İllərdən bəri arzuladığı konsertini reallaşdırmağın sevincinin üstünə bir də Zeynəb Xanlarovanın verdiyi qiymətin xoşbəxtliyi əlavə olunarsa, görün, nə olar?

"Zeynəb xanım mənə dedi ki, ona oxşayıram. O, mənə "sən mənim davamçımsan. Özün də mənə oxşayırsan. Sözü üzə deyirsən", - deyən Elnarə Abdullayeva Zeynəb Xanlarovanın ona söylədiyi bu sözlərdən qürur hissi keçirdiyini bildirdi. Asif Kərimov isə "bundan sonra məni kim təbrik etsə, təəccüblənmərəm", dedi.

Daha sonra müğənni İlhamə Quliyevanın göndərdiyi çiçəkləri alan Elnarə Abdullayeva sənətkarın xəstələndiyini eşidib təəssüfləndi. Qalan hamı artıq salondakı yerini tutmuşdu. Hətta əmək və əhalinin sosial müdafiəsi naziri Səlim Müslümov, millət vəkilləri, məmurlar...

Elnarə Abdullayevanın gözlədikləri də, Elnarəni gözləyənlər də gəlmişdi. Canəli Əkbərov, Mələkxanım Əyyubova, Vüqar Əhmədov, şeyx Əbdül... Elnarənin ailəsi və yaxınları, sənət dostları...

Elnarəni gözləyənlər isə lap çox idi. Konsertin biletləri tamamilə satıldığından bütün yerlər dolmuşdu. Məlum olduğu kimi, konsert əvvəlcə yalnız 1 gün, fevralın 20-də nəzərdə tutulurdu. Qısa müddət ərzində satılan biletlər konserti 2 gün keçirmək zərurətini ortaya qoydu. Odur ki, bu gün də Elnarə onu sevənlərlə növbəti dəfə canlı görüşəcək...

Elnarə Abdullayeva böyük səhnədə

Budur, xalq çalğı alətlərinin ifasında mahnı səslənir... yaşıl uzun geyimdə xanəndə səhnəyə daxil olur. İlk solo konsertinin ilk günündə səslənən ilk mahnı alqışlarla qarşılanır. Səhnə, əvvəlcədən elan olunduğu kimi, 2 hissəyə bölünüb. Bir tərəfdə xalq çalğı alətləri, digər tərəfdə klassik musiqi ifaçıları yerini alıb. Hələlik, xalq çalğı alətləri öz çıxışına başlayıb. Digər hissə işıqlandırılmayıb. Yaşıl köynək geyinən ansambl müğənni ilə rəng uyumu yaradıb. İlk mahnıdan sonra müğənni sevənlərinə ilk təşəkkürünü bildirir:

"Çox sağ olun ki, bu gününüzü bizə həsr etdiniz. Gələn ayaqlarınız var olsun. Allah cibinizə bərəkət versin. Xoş günlərə gələsiniz".

Xalq çalğı alətlərinin müşayiəti ilə davam edən müğənni "Qal sənə qurban" dedi.

Elnarə Abdullayeva, sadəcə, səsi və ifası ilə deyil, öz xasiyyəti ilə də tamaşaçı sevgisi qazanıb. Bu, müğənninin jestlərinə reaksiyalardan da aydın hiss olunur. Arada pərəstişkarlarından yorulub-yorulmadıqlarını soruşur, "yorulanda deyin", deməsi gülüşə səbəb olurdu. Hiss olunur ki, müğənni ağır iş həftəsinin yorğunluğunu təkcə səsi ilə deyil, sözü ilə də çıxarmağa çalışır. "Siz alqışlarınızla mənə sevdiyinizi hiss etdirirsiniz. Mən bilmirəm necə bildirim", - deməklə isə sevənlərinin ürəyini riqqətə gətirməyi bacardı.

Qədir Rüstəmovun repertuarından səsləndirdiyi "Sona bülbüllər" mahnısı ilə isə zalı tam ələ aldı.

Növbə təsnifindi. Elnarə korifey sənətkarlara, məşhur muğam ifaçılarına hörmətini bildirib Ağakərim Nafizə məhz onun repertuarı ilə davam edəcəyini bildirir: "Sizin təsniflərdən birini oxumaq istəyirəm. Bilmirəm, düz, ya əyri oxuyacam. Onsuz da, gəlmisiniz, pis də olsa, onsuz da, qulaq asacaqsınız".

Bu sözləri ilə zalda gülüşə səbəb olan müğənni təsnifin də öhdəsindən layiqincə gəldi. Beləliklə, muğam üçlüyünü qaboyların müşayiəti, onları da aşıqlarla duet əvəz etdi. Şirvan və Qərb aşıq məktəblərinin nümayəndələri ilə deyişən Elnarə meydanı kimsəyə buraxmadı.

Konsertinin buradan sonrasını klassik musiqi alətlərinin müşayiəti ilə davam etdi. Ancaq yavaş-yavaş yorulduğunu da etiraf edən müğənni "görürsünüz də, mənə nələr oxutdururlar" deyə gileylənməyi də unutmadı. Ağ köynəkli klassik musiqi ifaçıları ilə ağ libası ilə həmahənglik yaradan xanəndə Ramiz Mirişlinin bəstələri, Rübabə Murafovanın repertuarından "Heydərbabaya salam" mahnısı ilə davam etdi.

Səhnə birləşdi

Nəhayət, növbə son kompozisiyanındır. Bayaqdan bəri ikiyə bölünüb növbələşən xalq çalğı alətləri və klassik musiqi ifaçıları birləşdi. Birgə ifa olunan bu nömrə konsertin "son sözü" oldu. Son söz "aləm cənnətə dönsə, yaddan çıxmaz Qarabağ" oldu. Beləliklə, konsert başa çatdı.

Elnarə Abdullayeva, sözün böyük mənasında, bir daha ona olan tamaşaçı sevgisini sübüt edə bildi. Xanəndənin Sarayda verdiyi konsertdən isə hələ çox danışılacaq.

Milli.Az