"Azərbaycanın keçmiş müdafiə naziri Səfər Əbiyevin Çexiya vətəndaşlığı alması ilə bağlı yayılan məlumatlar tam yalandır."
ANS PRESS-in məlumatına görə, bu barədə onun yaxınlarından biri "Amerikanın Səsi"nə bildirib.
O deyib ki, S.Əbiyev xaricdə müalicə alır və bu günlərdə vətənə qayıdacaq."
Çexiyanın Azərbaycandakı səfirliyi də S.Əbiyevin Çexiya vətəndaşı olması ilə bağlı mətbuatda yayılan məlumatları təsdiqləməyib. Səfriliyin əməkdaşı bildirib: "Bizdə Səfər Əbiyevin Çexiya vətəndaşlığı alması barədə məlumat yoxdur.”
Azərbaycan Müdafiə Nazirliyinin mətbuat xidmətindən deyiblər ki, S.Əbiyev 2014-cü ilin martında ordu sıralarından tərxis edilib. General-polkovnik Səfər Əbiyev 1995-2013-cü illərdə Azərbaycanın müdafiə naziri olub.
Xatırladaq ki, yerli mediada son günlər keçmiş müdafiə naziri Səfər Əbiyevin Çexiya vətəndaşlığı alması barədə məlumatlar yayılır. Sosial şəbəkələrdə bununla bağlı geniş müzakirələr aparılır.
