“Qarabağda ən yaxın zamanlarda yeni müharibə başlaya
bilər. Ehtimal ki, bu apreldə olacaq”.
Publika.az xəbər verir ki, bu barədə erməni politoloq
Riçard Kirakosyan deyib.
Onun sözlərinə görə, Qarabağ ətrafında son danışıqlarda “Lavrov
planı” müzakirə olunurdu: “Hansı ki, bu ərazilərin qaytarılmasını
nəzərdə tuturdu. Rusiya və Azərbaycan Ermənistan olmadan bu
məsələdə razılaşmışdılar. Ümumiyyətlə Rusiyanın əsas məqsədi
Qarabağa öz sülhməramlılarını yerləşdirməkdir. Bu gün Qarabağ
münaqişəsi ətrafında diplomatiya dalana dirəndi və çox təhlükəli
vəziyyət yarandı. Bu, yaxın günlərdə yeni müharibənin başlanmasına
işarədir. Güman ki, yeni müharibə apreldə başlaya bilər. Yeni
müharibə olarsa, Azərbaycan daha çox ərazi əldə edəcək”.
Erməni politoloq qeyd edib ki, Azərbaycanı bundan sonra heç bir
qüvvə saxlaya bilməyəcək.
“İndi Ermənistan üçün daha təhlükəli vəziyyət yaranıb. ABŞ-da
Donald Tramp prezident seçiləndən sonra dünyada da bir çox şey
dəyişib. Trampın dövründə bizim üçün hər şey daha da pis ola bilər.
Biz yalnız ona ümid etməliyik ki, Tramp Cənubi Qafqaza diqqət
yetirməsin. Lakin bu gün deyə bilmərik ki, Tramp bu regionu
tamamilə Putinə verib. Buna görə də vakuum yaranacaq və ilk növbədə
Rusiya hərəkətə keçəcək. Rusiya Qarabağ məsələsində liderliyini
qorumaq üçün addımlar atacaq və Putin münaqişənin öz nəzarəti
altında həllinə tələsəcək”, - deyə o bildirib.
Qeyd edək ki, Ermənistan son günlər cəbhədə təxribat addımlarına əl
atır. Lakin Azərbaycan Ordusu düşmənin bütün cəhdlərinə cavab
verməklə yanaşı, bir neçə diversiya qrupunu da məhv edib.
Azərbaycan Müdafiə Nazirliyinin erməni diversiya qrupunun məhv
edildiyini əks etdirən videogörüntüləri yaymasından sonra
Ermənistanda ciddi təşviş yaranıb.
Bu arada, son günlər Ermənistanı tərk edənlərin sayı da xeyli
yüksəlib.
“Epress.am” yazır ki, ölkəni tərk edənlərin sayının artmasının bir
səbəbi sosial vəziyyətin ağır olmasıdır.
“Lakin digər səbəb cəbhədə yaranmış gərgin vəziyyətdir. Erməni
xalqı aprel döyüşlərini unutmayıblar və daha istəmirlər ki,
hakimiyyət öz sərvətini qorumaq üçün onları yenidən ölümə
göndərsin”, - deyə sayt bildirir.
Asif
