Moskva, 17 dekabr, AZƏRTAC
Dekabrın 17-də Rusiya Prezidenti Vladimir Putin Moskvada illik mətbuat konfransı keçirib. KİV işçiləri ilə birbaşa ünsiyyət 3 saatdan çox çəkib və Prezident 32 jurnalistin suallarını cavablandırıb.
Mətbuat konfransında Rusiya-Türkiyə münasibətlərinin şərhinə daha çox yer ayıran Vladimir Putin bildirib ki, “Türk axını” layihəsinin həyata keçirilməsi Brüsselin yazılı təminatı olduğu təqdirdə davam etdirilə bilər.
Suriya münaqişəsindən danışan Prezident Rusiyanın BMT Təhlükəsizlik Şurasında ABŞ-ın Suriya ilə bağlı irəli sürdüyü qətnaməni dəstəklədiyini bildirib.
Gürcüstan ilə əlaqələrə toxunan Vladimir Putin qeyd edib ki, Rusiya Gürcüstan ilə viza rejimini aradan götürməyə hazırdır. O, Gürcüstan ilə Rusiya arasında əmtəə dövriyyəsinin artdığını diqqətə çatdırıb.
Ukraynada vəziyyətin nizama salınması ilə bağlı suala cavab verən V.Putin deyib ki, Rusiya Ukraynaya qarşı heç bir sanksiya tətbiq etmək niyyətində deyil və Donbasda vəziyyətin nizama salınması üçün açıq dialoqa hazırdır.
Xatırladaq ki, V.Putinin böyük mətbuat konfransı artıq 11-ci dəfədir keçirilir. Budəfəki konfransda iştirak etmək üçün rekord sayda - 1390 jurnalist akkreditasiya olunub.
Fəridə Abdullayeva
AZƏRTC-ın xüsusi müxbiri
Moskva
