"Ölkəmizin cənab prezident kimi müdrik rəhbəri var. Əminəm ki, onun rəhbərliyi altında insanlarımız qarşıdan gələn ildə çətinliklərin öhdəsindən ləyaqətlə gələcəklər. Mən buna 100 faiz əminəm".
Bunu Milli.Az-a açıqlamasında Azərbaycan Respublikasının xalq artisti, tanınmış muğam ustası Canəli Əkbərov deyib.
Ustad sənətçinin fikrincə, növbəti il Azərbaycan üçün uğurlu il olacaq: "Azərbaycan xalqını qarşıdan gələn 31 dekabr - Dünya Azərbaycanlılarının Həmrəylik Günü və Yeni il bayramı münasibətilə səmimi qəlbdən təbrik edirəm. Yeni ildə özünü azərbaycanlı hesab edən hər kəsə möhkəm cansağlığı, ailə səadəti və xoşbəxtlik arzulayıram. İnanıram ki, 2016-cı il bizim üçün uğur və qələbələr ili olacaq".
C.Əkbərov xalqı üçün Allahdan dilədiklərini də gizlətməyib: "Bütün Azərbaycan xalqına arzum budur ki, Allah-təala ilk növbədə bizi öz nadanlarımızdan qorusun, onların ümidinə qoymasın. Allah-təaladan diləyim budur ki, sağlam ağılı bizə çox bilməsin. Diləyim budur ki, əmin-amanlıq bizimlə yar olsun, dövlətimiz hər zaman çiçəklənsin. Arzum budur ki, Azərbaycan necə inkişaf edirdisə, bu inkişaf yolundan dönməsin. Arzum budur ki, millət olaraq bir olaq".
İlkin İzzət
Milli.Az
