“Sayğaclara müdaxilə etmək birmənalı olaraq mümkün deyil”.
Metbuat.az -ın məlumatına görə, bunu “Azərişıq” Açıq Səhmdar Cəmiyyətinin (ASC) SMS sayğaclar şöbəsinin rəisi Araz Məmmədzadə iyul ayı abonentlərin aylıq elektrik enerjisi sərfiyyatına aid keçirilən mətbuat konfransında deyib.
Onun sözlərinə görə, “Azərişıq” ASC-nin quraşdırdığı sayğaclara ancaq fiziki müdaxilə etmək olur:
“Sayğacın üzərində tarif quruluşunu dəyişmək olar. Çünki bu, multitarif rejimindədir. Elektron sayğaclarda abonentlər tarif quruluşunu, kilovat, saat hesabını özü hesablaya bilir. Abonentlərə tövsiyyə edirik ki, bir saat ərzində istehlak etdikləri elektrik enerjisini sayğacla uyğunlaşdırsınlar. Bunun üçün göstəriciyə baxıb, hansısa bir vərəqdə bu rəqəmi qeyd edirik. Bir saatdan sonra göstəricinin dəyişmə dinamikasını yenidən qeyd edirik. Arada yaranan fərq sizin bir saat ərzində istifadə etdiyiniz elektrik enerjisidir. Bu prinsiplə yoxlanmış, yaxud öz büdcəsini planlaşdıran abonentlərdə problem yaranmır. Çünki həmin insanlar saatlıq sərfiyyatını bilir. Öncədən ödəməli sistemə malik olan sayğaclarda isə belə hal müşahidə olunmur. Çünki abonentlər sayğaclarına öncədən vəsait yükləyir və tədricən yükləyir”.
Araz Məmmədzadə əlavə etdi ki, sayğaclar xüsusi şifrələnmiş qaydada oxunur:
“Sayğacların yaddaşında “hadisələr jurnalı” deyilən hissə var. Bir saatlıq, həftəlik, aylıq, yarım illik və illik göstəricilər, sərfiyyat, istehlak orada öz əksini tapır. Hətta enerji kəsilmələri belə orada qeyd olunur. Həmin yaddaşı oxumaqla bütün məlumatları əldə edə bilirik. Son günlər sayğaclardan şikayətlənən abonentlərin müraciətinə əsasən, yerlərdə çox olduq. Sayğaclar yoxlanıldı, amma qüsur aşkarlanmadı. Ümumiyyətlə, smart, elektron rəqəmsal sayğacların hamısının bir standartı var. Funksiyalar fərqli ola olsa da, onlarin yeganə işi elektrik enerjisinin miqdarını hesablamaqdır. Təqdim olunan sayğacların hər biri beynəlxalq standartlara cavab verir. Hər birinin ölkə standartlarına uyğunluq sertifikatı var. İstismardan öncə həmin sayğaclar “Azərişıq” ASC-nin laboratoriyasında bütün parametrlərinə görə yoxlanılır. Bu yoxlamalarda standarlaşma institutunun nümayəndələri iştirak edir və öz yoxlamalarını təsdiqləyən möhürlə sayğacları təsdiqləyirlər”.
Xəyalə Məmmədova / METBUAT.AZ
Qaxda sel suları körpünü uçurub, bir kəndlə əlaqə kəsilib - - FOTOLAR – Tıklayın!
