Dirçəliş Hərəkatı Partiyasının sədri, Milli Məclisin deputatı Fərəc Quliyev millət vəkili həmkarı Tahir Kərimlinin təqvim aylarına yeni adların verilməsi barədə təklifini dəstəkləyib.Milli.Az xəbər verir ki, F.Quliyev "ölkə.az"a açıqlamasında bildirib ki, Tahir Kərimlinin təklifi milli maraqlara uyğundur:"Tahir Kərimli mənim dostum və keçmiş hərəkat yoldaşımdır. Tahir bəyin fikirlərinə hörmətlə yanaşıram. Onun ayların adının dəyişdirilməsi barədə təklifilə bağlı da fikir bildirmək istəmirəm. Tahir bəy millətçi və dövlətinə bağlı olan adamdır. Onun bütün fəaliyyətində və davranışında əsas istiqamət millətə xidmət olub". Deputat milli sözlərdən istifadə edilməsinə tərəfdar olduğunu söyləyib:"Bütün hallarda mən də davranışlarda milli sözlərdən istifadə edilməsinin tərəfdarıyam. Bizim türk sözlərimiz var. Hesab edirəm ki, türk sözlərindən istifadə edilməlidir. Daha öz lüğətimizdə olan sözləri kənara qoyub başqa sözlərdən istifadə etməli deyilik. Ayların da adlarının dəyişdirilməsi üçün imkanlar varsa, bundan yararlanmaq normal olardı. Yəni, bütün məsələlərdə milli maraqlar öndə olmalıdır. Biz bu ənənəviliyi və mühafizəkarlığı qorumasaq, təbii ki, əlimizdə olan resursları itirmiş olarıq. Hesab edirəm ki, Tahir bəyin də bu təklifi normal yanaşmadır. İndi burada Tahir Kərimli nə yaltaqlanmalı söz deyir? Yaltaqlanmaq odur ki, kimisə bayağı tərif edirsən, yaltaqlanırsan və sairə. Amma Tahir bəy deyir ki, millətimizin adını uca tutaq, mühafizakar davranaq. Bunun nəyi pisdir? Bu normal bir davranışdır. Əslində, belə şeylərdən imtina etmək milli maraqlardan imtina etmək kimi bir haldır. Bu baxımdan Tahir bəyin davranışı çox doğru hərəkətdir".Xatırladaq ki, Milli Məclisin deputatı, Vəhdət Partiyasının sədri Tahir Kərimli təqvim aylarına milli adların verilməsi təklifilə çıxış edib.Tahir Kərimli "modern.az"a bildirib ki, zaman-zaman böyük dövlətlərdən asılılıq, digər hakim dillərin həyatımıza daxil olması səbəbindən dilimizin əsaslarının zəiflədilməsi prosesi gedib:"Hesab edirəm ki, ana dilimizin ictimai, məişət və ədəbi həyatımızda daha üstün yer tutmasını təmin etməliyik. Övladlarımıza mümkün qədər daha çox milli adlar qoyulmalı, milli soyad sonluqları seçilməlidir. Yaradılmış hüquqi şəxslərə - müəssisə və məkanlara milli adlar verilməlidir. Bunun qanunvericilikdə nəzərdə tutulması da mümkündür".

Deputat bir sıra dövlətlərin təqvim adlarını dəyişmək cəhdlərinin uğursuz olmasının, həmçinin, qarşılaşa biləcəyimiz digər çətinlikləri nəzərə alaraq, Qriqorian təqvimini saxlamaqla, paralel olaraq, təqvim aylarına aşağıdakı milli adları təklif edib:1. İlk ay (yanvar)
2. Soyuq (çillə ay) ay (fevral)
3. Boz ay (mart)
4. Yağış ayı (aprel)
5. Çiçək ayı (may)
6. Əkin ayı (iyun)
7. İsti ay (iyul)
8. Biçin ayı (avqust)
9. Məhsul ayı (sentyabr)
10. Qızıl ay (oktyabr)
11. Xəzəl ayı (noyabr)
12. Son ay (dekabr)

"Sadə və anlaşılan bu sözlər 100 illərlə xalq dilində işlənib. Və mənasını hamı anlayır. Ukraynalılar "Serpen", "Jovtnya", "Listopada" ay adları işlətməklə özlərinə böyük hörmət aşılatdıra biliblər. Biz də ən azı məişət və ədəbiyyatda bu adlardan istifadə edə bilərik".

Deputat əlavə edbi ki, bizdən asılı olacaq qədər dilimizdəki əcnəbi sözləri çevirib işlədə bilərik: "Məsələn, "nəzərinizə çatdırırıq" sözü əvəzinə "baxışınıza veririk", "təklif edirəm" sözü əvəzinə "irəli sürürəm". "Feil" sözü əvəzinə "hərəkət", "və" bağlayıcısı əvəzinə "ilə" və s. yüzlərlə belə sözləri öz dilimizdə anlaşılan şəkildə işlədə bilərik". Tahir Kərimli həmçinin qeyd edib ki, milli identifikasiyamızı təsdiq etmək üçün geyim, mətbəx və mədəni həyatımızda özünəməxsusluğu qoruyan atributlarımıza vətəndaşlıq hüququ qazandırmalıyıq. Deputat eyni zamanda insanları bu təşəbbüsə qoşulmağa və dəstəkləməyə çağırırıb. Milli.Az