Milli Məclisin Elm və təhsil komitəsinin üzvü deputat Etibar Əliyev yüksək bal toplayan tələbələrin intihar etməsi ilə bağlı post paylaşıb.
Metbuat.az xəbər verir ki, deputat gənclərin bu intihar səbəblərinin araşdırılmalı olduğunu deyir. O həmçinin bildirib ki, məktəblərdə sosiologiya və psixologiya elmlərinin tədrisi düzgün aparılmalıdır:
"2016-cı ilin oktyabr ayının 10-da Bakı Ali Neft Məktəbinin 4-cü kurs tələbəsi Abbasov Hüseyn Maarif oğlu intihar etmişdi. H. Abbasov qəbul imtahanlarından 670 bal toplayıb bu Ali məktəbə daxil olmuşdu. 2022 –ci ilin oktyabr ayının 7-də UNEC-in 4-cü kurs tələbəsi Şəhriyar Səmədov Bakının Nizami rayonu Qara Qarayev prospektində kirayə yaşadığı mənzildə özünü asıb. Şəhriyar 684,8 bal toplayaraq UNEC- ə qəbul olunmuşdu. O, həm də Prezident təqaüdçüsü idi.
Belə bir analogiya!!! Bu iki dəyərli gəncin özlərinə qəsd etmələri insanın qanını dondurur. İntihar aktları dərindən təhlil olunmalıdır. Əlbəttə ki, bu, sosioloqlarla psixoloqların işidir. Ali məktəblərdə sosiologiya və psixologiya elmlərinin tədrisi dalana sıxılıb. Müəllimlərin fəndəki yeniliklərdən xəbərləri yoxdur. Fəlsəfə isə ümumiyyətlə yığışdırılır. Cəmiyyət və fərdlə bağlı 3 elm sahəsinin tələbələrə tədrisi acınacaqlı durumdadır. Televiziyaları isə tənqid etmək olmaz. Bu təfəkkür məsələsidir".
