İnsanların çoxu ən ağıllı quş deyəndə tutuquşuları düşünür. Ancaq alimlərin müşahidələri göstərir ki, bu sahədə əsl sürpriz başqa quşdur.
Metbuat.az xəbər verir ki, Yeni Kaledoniya qarğası mürəkkəb problemləri həll etmək və müxtəlif vasitələrdən məqsədyönlü istifadə etmək bacarığı ilə seçilir.
Bu quşlar sadəcə hazır alətlərdən istifadə etmirlər. Onlar qidanı əldə etmək üçün çubuq və digər materiallardan uyğun alətlər hazırlaya bilirlər. Daha maraqlısı isə bəzi tapşırıqları bir neçə mərhələdə düşünərək yerinə yetirmələridir.
Araşdırmalar qarğaların yaddaşının da kifayət qədər güclü olduğunu göstərir. Onlar ətraflarındakı obyektləri tanıya, əvvəlki təcrübələrindən yararlana və dəyişən şəraitə uyğunlaşa bilirlər.
Mütəxəssislər hesab edirlər ki, qarğaların bu qabiliyyətləri onların təbiətdə yaşamaq və çətin vəziyyətlərdən çıxmaq imkanlarını əhəmiyyətli dərəcədə artırır.
Yəni dünyanın ən ağıllı quşu axtarışında cavab gözlədiyinizdən xeyli fərqli ola bilər: qarğa!
