"İlk növbədə onu qeyd etməliyəm ki, hazırda bizi öncə komandamızın hazırlığı düşündürür. Məlum səbəblərdən komandamız hələ tam yığışa bilməyib. İyunun 24-dən etibarən tam heyətlə hazırlaşa biləcəyik. Bu baxımdan maksimum halda ilk oyuna qədər hazır olmağa çalışmalıyıq".

ANS PRESS-in məlumatına görə, bu sözləri Çempionlar Liqasının püşkatması ilə bağlı danışan "Qarabağ"ın baş məşqçisi Qurban Qurbanov deyib.

"Qarabağ" Çempionlar Liqasının I təsnifat mərhələsində Çernoqoriya çempionu "Rudar"la qarşılaşacaq. Qurbanov rəqiblə bağlı fikirlərini bildirib: "Rəqib haqqında onu deyə bilərəm ki, çətin oyun olacaq. Balkan klublarına qarşı oynamaq bizə həmişə çətin olub. Həm də onları bizi daha yaxşı tanıyırlar. Bu dəfə də istisna deyil. Belə deyərdim ki, bu oyun bizə hamısından daha önəmlidi. Deyərdim ki, bu tur "play-off" qarşılaşmasından daha önəmlidi".